Forstî bi wesîleya qebûlkerdişê serra 70ine ya Deklarasyonê Heqanê Merdiman Parîs de qisey kerd û vat: “Tabloya vernîya ma xeylî xirab a. Mabênê serranê 2015 û 2017î de 1.100 pawitoxê heqanê merdiman kişîyayî. Hêrişê fîzîkkîyî, gefî, desteserkerdişî, werte ra wedartişî hemeyê dinya de bîyî vêşî. Ser de zî nê sûcî bêceza manenê.”

Forstî seba bêcezatî zî nimûneyê kişîyayîşê 100 pawitoxanê heqanê merdiman ê Amerîkaya Latîne da û vat ke nê kiştişan ra tenya derheqê 5 kesan de tehqîqat ameyo kerdene, nê dewayan ra di heban de seba ke delîlê konkretî estbî ameyî mehkumkerdene.    

Forstî dewam de derheqê hedef ramojîyayîşê pawitoxanê heqanê merdiman de fikarê xo ardî ziwan û vat ke Rojawanê Ewropa zî tede dinya de yeno waştene ke cayê cimatê sivîlî bêro tengkerdene.

Kombîyayîşo ke Parîs de virazîya pawitoxê heqanê merdiman zî tewrê ci bîyî û şahidîyê xo qal kerdî. Qiseykerdişê girewtişî hetê wezîrê karê teberî yê Fransa Jean-Yves le Drianî ra ame kerdene. Drianî vat: “Ma bunyeya Yewîya Ewropa de zî xusûsen rîyê vêşîbîyayîşê vatişanê populîstan ra benê şahidê kemîbîyayîşê heqanê merdiman.”