HRWyî bale ante qirkerdişan ser ke Malî de hetê komanê çekdaran ê îslamîyan ra û hêzanê xopawitişê komelkî ra ameyî kerdene ke netîceya nînan de tewr tay 450 kesî ameyî kiştene û waşt ke berpirsîyarî bêceza nêrê veradayene.
Rêxistina Çimdarî ya Heqanê Merdiman (HRW) persê ''Şima ganî hînî senî gonîye birijnê?'' persa. Rapor de roportajê ke 150 mexduran, lîderanê komelanê Poller û Dogonî, berpirsîyaranê weşîye û edlîyî û pisporan de ameyî kerdene pare bîyî.
Mudira HRWyî ya masaya rojawanê Afrîka Corrîne Dufka vat: ''Herêmanê mîyanênan ê Malî de komê çekdarî bi giranî merdiman kişenê , seqet verdenê û komel terorîze kenê.'' Dufka vat: ''Aseno ke nêtersenê ke hesab bidê.''
Berpirsîyara HRWyî vat: ''Heta ke tedaya kiştoxan û hîsê qesasî dibare bibê bîlançoyê mergan do bibo zêdêr.''
Komê ke xo sey cîhadîst pênase kenê serra 2012î de vakurê Malî de vejîyayî werte û merkezê welatî û welatanê Burkina Faso û Nîjer de zî vila bîyî. Her çiqas herême de hêzê Fransa, hêzê herêmîyî û hêzê Neteweyanê Yewbîyeyan zî estê, komê îslamî hema zî vila benê.
