Hukmatê Sûrîye: Tirkîye peameyîşê Idlibî rê rîayet nêkena

Wezîrê karê teberî yê Sûrîye Welîd Muallimî hemverê rîayet nêkerdişê pêameyîşê Idlibî yê Tirkîye de reaksîyon ramot.

Goreyê xebera ajansê Sana wezîrê karê teberî Welîd Mallimî vat: “Terorîstî hewna bi sîlehanê giranan na herême de yê. No ramojneno ke Tirkîye sozê xo bica nêardê.”

Wezîrê karê teberî yo tirk Mewlud Çavuşogluyî îdîa kerdibi ke pêameyîş goreyê qeraro ke ameyo girewtene dewam keno.

Pêameyîşê Idlibî mabênê Rûsya û Tirkîye de serê aşma Êlule de ame viraştene. Goreyê nê pêameyîşî ganî mabênê wareyanê ke destê hêzanê Sûrîye de yê û yê ke destê grûbanê çeteyan de yê heta 15ê Teşrîna verêne herêmêka tamponî biameyêne viraştene.  

Enqereyî soz dabi ke do mîyanê ê wextî de grûbê çeteyan sîlehanê giranan ê ke herême de yê biancê. Her çend rejimê Enqereyî îdîa keno ke çeteyan sîlehê xo ûca ra vetê zî na îdîa hewna hetê çimeyêkê xoserî ra nêamîya raştkerdene.