Wina pawîyeno ke weçînayîşê serekkomarîya Iraqî ewro do bêro kerdene. La biranê boykotî û betalkerdişê namzetîya namzetê PDKyî Hoşyar Zebarîyî ra dima yeno qerqilîyeno ke weçînayîşê serekkomarîye bêro taloqkerdene.

Seba ke weçînayîş bêro kerdene ganî 329 wekîlan tewr tay 3 baran ra 2 barê ci tewrê weçînayîşî bibo.

Lîderê têgêrayîşê şîayan Muqteda Sadro ke parlemento de wayîrê 73 kursîyan o pare kerd ke o do tewrê raydayîşî nêbo. Îtîfaqanê Sadrî, Koalîsyonê Serwerîye ya bi serkêşîya Serekê Parlamentoyî Muhammed El Halbusî bira boykotî daye. Heman bire hetê PDKyî ra zî ameye dayene.

Dormeyê Yewîya Karî yo ke terefgîrê Îranî yo, îfade kerd ke ganî roniştişê parlamentoyî bêro kerdene. Bi nê hawayî alozîya sîyasîye dewam kena.

Serekkomarîya ke wezîfeyê xo bi giranî sembolîk a, bi hawayêkê tradîsyonelî dîyena kurdan. Labelê PDK û YNKyî namzetê cîyayî mojnayî. PDKyî Wezîro verên ê Karanê Teberî Hoşyar Zebarî, YNKyî zî Serekkomaro nikayên Berhem Salih kerd namzetê xo.

Derheqê namzetê PDKyî de sûcdarîya bêusûlîye esta coka Sadrî paştdayîşê xo yê seba Zebarîyî aepy girewt.

Wina pawîyeno ke prosesê weçînayîşê serekkomarî/e do zehmet derbaz bibo.