Dewleta tirke vizêr dewa Perexî ya Zaxoyî ya Başûrê Kurdîstanî de turîstê erebî bi bombardumanî qetil kerdî. Hêriş de zafê ci cinî û domanî 9 kesan dinyaya xo bedilnaye û 29 kesî zî birîndar bîyî.

Dima ke dewleta tirke Zaxo de vera turîstanê ereban qirkerdiş kerd, pêr Iraq de rojêke şîn ame îlankerdene.

Qirkerdişî ra dima Iraq de nêrazîbîyayîşê pîlî qewimîyayî. Serekwezîrê Iraqî Mistefa Kazimîyî cade hêrişê dewleta tirke şermezar kerd. Wezîrîya Karanê Teberî venga sersefîrê Tirkîya da, Heyetê Asayîşê Neteweyî venga da ke wa Tirkîya erdê Iraqî ra hêzanê xo bianca.

Vizêr şan zî xeylêk şaristanan de bi taybetî Bexdad de çalakîyê protestoyî ameyî kerdene. Alaya tirkan a sersefîrîya Tirkîya hetê çalakîkeran ra ameye vetene. Kerbela de zî merkezê vîze de alaya tirkan ameye vêşnayene.

Wekîlanê Iraqî venga parlamentoyî da ke kombîyayîşo lezabez bêro kerdene. Eşkerayîya hempare ya 91 wekîlan de ame waştene ke wa Serekwezîrê Iraqî Mistefa Kazimî zî kombîyayîş de amade bibo. Eşkerayîye de ame îfadekerdene ke dewleta tirke bi qirkerdişê sivîlan sûcê şerî kena û qanûnanê Neteweyanê Yewbîyayeyan binpay kena.