Komara Karabagî ya ke Armenîstan paştî dano ci, roja yewşemeyî bîye hedefê hêrişê artêşa Azerbaycanî.  Serra 2016î ra nata herême de şer qewimîyeno. Wird terefan ra zî bi desan kesî merdî. Goreyê eşkerayîyan ê fermîyan zî bi seyan kesî kişîyayî.

Şer şewa dişeme-sêşemeyî zî dewam kerd. Wezaretê Pawitişî yê Armenîstanî vat: ''Hêzanê Armenîstanî cepheyê şerî de cewab da hêrişanê Azerbaycanî û xeylêk vînkerdişê dişmenî estê.''

Vervatoxê Wezaretê Pawitişî Arstrun Hovhanisyanî keyepelê xo yê facebookî de eşkerayîyêke daye û da zanayene ke Azerbeyvan çeperanê armenan ser o bi giranî bombayî varnayî û ê xo seba hêrişêkê neweyî amde kenê.

Wezaretê Pawitişî yê Azerbaycanî zî eşkera kerd ke şewe şerêko çetin qewimîya. Wezaretî pare kerd ke serê sibayê sêşemeyî de hêzanê azerîyan vera şaristanê Fizûlîyî dest pê operasyonî kerd.

Heta nika şer de tewr tay 95 kesî merdî ke înan ra 11 tenî sivîl ê. La yeno vatene ke bîlançoya rastikêne giranêr a. Wird terefî zî beyan kenê ke şer de bi seyan leşkerî kişîyayî.

Dewleta tirke bi hawayêkê kifşî paştî dana Azerbaycanî. Selahîyetdarê Karabagî vanê êyê ke vera înan şer kenê teyara, helîkopter û leşkerê bipere yê dewleta tirke yê.

Rûsya, Fransa, DYA û Neteweyê Yewbîyayeyî zî tede hêzê mîyanneteweyî venga wird terefan danê ke cade adirbirnayîş bikerê.

Yeno pawitene je Neteweyê Yewbîyayeyî roja sêşemeyî (ewro) derheqê mesele de kom bibê. Yeno vatene ke şerê Erîvan û Bakuyî yo ke Rûsya û Tirkîya tewrê ci bîyê, do Başûrê Kafkasya têmîyan bikero.