Goreyê tayê xeberanê medya ya Îsraîlî, serekwezîr Benjamîn Netanyahû do bedelê jestanê serekê DYA Donald Trumpî de tayê tawîzan bido. Goreyê na îdîa tayê kolonîyê îşxalî yê ke Şerîaya Rojawanî yê Filistînijan de ameyê ronayene do bêrê wedartene.

Labelê Netanyahûyî vat, do dest nêdê ca û wareyê Cihûdîyanê Şerîaya Rojawanî û bi nê hawayî reyna ramot ke nêwazeno şarê Filistînî dir werey bêro. Netanyahûyî vat, “Çarçewaya kamcîn planê aşitîye de beno wa bibo ma do destûr nêdê ke tu kolonîyêk bêro wedartene”

Na eşkerayîya Netanyahûyî ramot ke verê weçînitişê pêroyîyî yê menga Êlule do tewirê xo yê çetinî bidomno.

Planê aşitîye yo ke serekê DYA Donald Trump do seba Filistînî eşkera bikero yeno pawitene ke şarê Filistînî paştî nêdo ci. Îdareyo Xoser ê Filistînî xeylî reyan vatibi ke Trumpo ke Qudis sey paytextê Îsraîlî nas keno, ‘nêeşkeno bibo het.’

Şerîaya Rojawanî de 3 mîlyonî rê vêşêr Filistînijî û rîyê îşxalkarîya 1967’î ra nata zî bi qasê 600 hezarî Cihûdîyî estê. Mabênê Cihûdî û Filistînijan de tim şer virazêno.