Pisporê Rûsya û Akademîsyen Dr. Îsmet Konakî derheqê şerê mabênê Ukrayna û Rûsya de ANFyî rê qisey kerd.

Konakî da zanayene ke rojdemê nimiteyî yê Rûsya de tim operasyonê vera Ukrayna estbi û vat: ''Sovyetan ra dima Putinî olîgarkê xo awan kerdî. Rûsya Ukrayna sey bazarêkê qijî vînena coka hêrişê ci kena. Yanî no şer mabênê olîgarkan de yo. Zelenskiyî wexto ke NATO û Amerîka de têkilîye naye ro karê Rûsya bi asanêr. Putinî têgêrayîşê Zelenskiyî xo rê kerd bahane û îşxal da destpêkerdene.

Şerê mabênê Ukrayna û Rûsya mabênê Rûsya û NATOyî de şerê hegemonya yo. Safhaya corine ya kapîtalîzmî wazena derbazê emperyalîzmî biba. Nika vera Rûsya tedayê pîlî estê; Yeno waştene ke Rûsya sîstemê SWIFTî ra bêra vetene. No zî zor dano sermayedaranê Rûsya ke vera îşxalî tewir bigêrê.''

Konakî da zanayene ke NATO û blokê rojawanî hînî bi rejîmê Erdoganî bawer nêkenê û 2023 de hetê Rûsya ra qederê Erdoganî do bêro dîyarkerdene. Konakî ard ziwan ke tirkîya nika gamanê xo bi tedbîrî erzena la no şer bi taybetî hetê ekonomîkî ra tesîrê Tirkîya bikero.

Konakî bale ante polîtîkayanê Tirkîya û Rûsya yê serê Sûrîye û vat: ''Tirkîya endama NATOyî ya la Sûrîye de mendişê ci pabesteyê Rûsya yı. Êlula 2021î de Soçî de krîzê Îdlîbî ame nimitene. Eke Tirkîya şerê Ukrayna de hetê NATOyî de biba Sûrîye de hemsengî do bivurîyê û hêzê Tirkîya Sûrîye de do bişikîyo. Rûsya zî do bala xo bida şerê Ukrayna û Sûrîye ser û bi nê hawayî do teng biba. Coka Rûsya do Sûrîye de bitedbîr têbigêra.''