Vîrusê Covid-19î yo ke Çînî ra vila bi pêro dinya hema Afrîka de vila nêbi.Eke vîrus Afrîla de vila bibo sîstemê weşîye yê ci do çin bibo. Vîrusê Covid-19î pêro dinya de weşîye reyde tesîrê ekonomîyî zî kerd. Yeno pawitene ke no tesîr zî tewr zêde do Afrîka de xo bimojno ra.

Pisporanê Bernameyê Werdî yê Dinya (WFP) yê Neteweyanê Yewbîyayeyan (NY) Arîf Husaînî çend rojî verê cû eşkerayîyêke daye û pare kerd ke Covid-19î ra semed peydakerdişê berhemanê zîretî de rewşêka girane esta.

Goreyê WFPyî rîyê karantînaya Covid-19î ra tay dewletî û şexsî xîret kenê ke werd kom bikerê û naye ra xelaya tay berheman vîrazîyaye. Eke rewşe wina dewam bikera û ekonomî qelsêr bibo, beno ke welarê tewr xizanî hetê werdî ra zor û zehmetîyan biancê.

Goreyê doneyanê WFPyî her serre 2.8 mîlyar merdimî bi sayê birinc, soya, genim û lazutî ra ke teberî ra yenê, eşkenê miqatê xo bibê. Nê kesan ra 307 mîlyon kesî zî welatanê 'bêasayîşê werdî' yan zî rewşêka xela de manenê.

Goreyê WFPyî qelsîya ekonomîyî ya ke rîyê Covid-19î ra do biqewimîya welatanê xizanan de biba semedê mergê vêşanîye. Tewr zêdêr zî welatê Afrîka tesîrê na qelsîye de bimanê. 

WFPyî eşkera kerd ke welatê sey Îran û Iraqî yê ke ekonomîyê ci pabesteyê rotişê petrolî yo û welatê sey Sûrîye û Yemenê ke tede şerê zereyî esto mîyanê tehlukeyî de yê.