Serekwezîr Vîktor Orban û hukmatê ci yê ke serra 2010î ra nata welatî bi polîtîkayanê raşt-populîstan rayra benê zextê xo yê serê dormeyanê cimatî yê cîyayan kerdê vêşî. Hukmatî tewr peynî qanûnêk ke xebatkaran keno koleyê karsazan vet. Goreyê qanûnê neweyî karsazî eşkenê meaşê karkeran bi serran nêdê.

10 hezar ra vêşêr kesê ke bi slogana “Ma nêwazenê bibê kole” paytext Budapeşt de vejîyayî kuçeyan waşt ke qanûnê koletîye pey de bêro antene. Çalakîya ke bi vengdayîşê partîyanê muxalefetî û sendîkayan amî viraştene de hemverê partîya hukmatî Fidesz de zî sloganî erzîyayî.

Qanûnê Xebate yê hukmatê Vîktor Orbanî yo ke dimayê Noelî ra kewt dewre îmkan dano ke karsazî karkeran sey kole bidê xebitnayene. Goreyê nê do karkeran ra bêro waştene ke serre de heta 400 saetan mesaîya îlaweye bikerê. Hetêna ra bi nê qanûnî îmkan dîyeno şîrketan ke heta 3 serran dayîşê meaşê karkeran pey de bierzê.