Serekkomarê Fransa Emmanuel Macronî kovara Paris Matchî rê roportajêk da û bi vatişanê tûjan Erdogan rexne kerd.

Macronî pare kerd ke polîtîkayê dewleta tirke 'faktorê bêîstîkrarî' yê û goreyê menfaatanê Ewropa nîyê. Macronî da zanayene ke Erdogan nîjadperestî û îslamperestî reyde polîtîkayêka 'talankere' ano ca.

Macronî vat: ''Ganî Ewropa naye bivîna û mesuldarî bigêra. Dewleta tirke Dengizê Sipî de bi hawayêkê îlegalî gêrena petrol. Seba ke keştîyê şerî yê dewleta tirke Qibris û Yunanîstan de faalîyetê sondajî kerd alozîye bîye pîlêr.

Fransa hewteyê vîyarteyî de seba ke paştî bida Atîna di keştî û teyarayê şerî erşawitbî.

Macronî vat: ''Fransa Dengizê Sipî de wayîra hêzêkî ya. Wexto ke mi Erdoganî reyde pêvînayîş kerdbi xeylêk kesî pê naye qayîl nêbî. ''

Nê serranê peyênan de têkilîya mabênê Fransa û Tirkîya xeripîyaye. Fransa îşxalê Rojawanî ra dima vatbi ke hînî NATO bêtesîr o û barcî zî nê di welatî zaf reyî ameyî têvera. Îşxalê dewleta tirke yê vera Lîbya û Dengizê Sipî de faalîyetê ci yê sondajî zî alozîye kerde geş.

Fransa vera kişîyayîşê di fermandaranê Iraqî zî nêrazbîyayîşê xo mojnabi û waştbi ke na mesele bêra roşnîkerdene.