Parîs de serewedartişê ‘Yelegê Zerdî!’

Çalakîyê Yelegzerdan ke roja Şemeyî Fransa de destpêkerdîbî, heme hetanê Parîsî de agêrayî pêkewtişan. Bi seyan kesî gîrîyayî binê nezaretî, bi desan birîndar bî û wesayîtî, bankayî û banî ameyî vêşnayene.

Polîtîkayê serekkomar Emmanuel Macronî yê ke bêedaletî hîna kenê xurt Parîs de bî sebebê serewedartişan. Hêrsê şarî yê hemverê bêedaletîya sosyale kewt kuçeyan. Her roje xusûsen çalakîyê Yelegzerdan otorayîranê cîyayan ê welatî de yenê viraştene.

KOALÎSYONÊ HÊRSÎ

Rixmê 66 hezar polîs û cendirmeyî hetê Wezaretê Karê zereyî ra seba asayîşî ameyî wezîfedarkerdene zî nêeşkayî vernîya reaksîyonî bigîrê. Xusûsen hîrêgoşeyê meydanê Etoile, garê Louvre û Saint-Lazarî de koalîsyonêkê hêrsê virazîyayo.

Bi gaz mudaxelekerdişê polîsan netîce nêgirewt. Çalakwanê bimaskeyî yê ke hadre bîyî bi çîyanê destê xo cewab dayî polîsan, her çatrayîrî de barîkatî dayî ro.     

BI SEYAN BINÇIMKERDIŞÎ Û BIRÎNDARÎ

Goreyê Mudurîya Asayîşî ya Parîsî tewr tay 287 kesî gîrîyayî binê nezaretî. Tera 17ê înan hêzê asayîşî 110 kesî zî birîndar bî. Numayîşanê şaristanê Tourî yê Fransa de zî tewr tay 30 kesî birîndar bî. Pêkewtişanê ke Parîs de biroj heta şan dewam kerdî ra pey wesayîtê vêşnayeyî, mixazayê ke vîtrînê înan şikîyayê û bankayê ke ameyê tehrîbkerdene mendî. Tewr tay 19 îstasyonê metroyan gîrîyayî.     

TEHDÎDÊ HALÊ ÎSTÎSNAYÎYÎ

Wezîrê Karê zereyî Christophe Castanerî gefê apey ardişê halê îstînayîyî ro şarî werdî. Halo îstîsnayî dimayê çalakîyanê DAÎŞî ra 2015 de amebi îlankerdene û Teşrîna peyêne ya 2017î de zî amebi wedartene. Serekkomarê Fransa Emmanuel Macrono ke seba tewrbîyayîşê kombîyayîşê G20 Arjantî de yo vat “Tu têkilîya nê çîyan bi îfadeyê hêrsî yê aşitîyaneyî dir çinya.” Macronî gefê do mesuldarî bêrê tesbîtkerdene û verê edaletî de hesab bidê ro şarî werdî.

SEREWEDARTIŞÊ YELEGZERDAN

Çalakîyanê Parîsî de vengê sey “Macron nêwazo zî ma tîya yê, ma seba rûmetê karkeran û dinyayêka hîna rinde tîya yê” û “ma bombayanê gazan ra nêtersenê” berz bîyî.

Hedefê serewedartişê Yelegzerdan de verê heme çî bêedaletîya bace û keyfîyetê dewlete esto. Manaya pêroyîye de merkezê nê serewedartişî de waştişê seypêyîye esto.