Berpirsîyarê Karanê Teberî yê PJAKî Zegrus Enderyarî derheqê şerê mabênê Îran û Îsraîlî de qisey kerd. 

Enderyarîyî nê ercnayîşî kerdî:

‘’Nê pêkewtişê mabênê Îran û Îsraîlî seba şarî yenê manaya xorinbîyayîşê krîzî. Rojhelatê Kurdîstanî de zî rewşe xirab bena. Rejîmo ke ho rijîyeno kurdan hîna zaf hedef kena. Beno ke rejîm bi bahaneya hêrişanê Îsraîlî ancî paştgîranê Şorişê Jin, Jiyan, Azadî hedef bikero. Beno ke tepişteyê sîyasî, lîderê komelî û şorişgêrî bêrê dardekerdene.

Ganî şarê ma nê prosesî de mîyanê paştdayîş û rêxistinkerdişî de bibo. Ma sey PJAKî xebitîyenê û şarê xo rêxistin kenê. Ma do şarê xo bêpawitiş nêverdê, amade û rêxistinkerde yê. Hêzê ma est o ke ma şarê xo bipawê.

Ganî kurdî bi baldarî nêzdîyê nê şerî û qewimîyayîşanê herême bibo. Şorişê Jin, Jiyan, Azadî ra dima mîyanê hêzanê kurdan de bingeyê PJAKî de yewîyêke virazîyabî. Ganî na yewîye bêra xurtkerdene. Ganî hêzê Rojhelatê Kurdîstanî pîya têbigêrê.

Ma Rojhelatê Mîyanênî de rayîrê hîrêyînî pawenê. Ma îdareyanê herêmîyan pawenê. Ma nê şerî de teref nîyê. Ma nêwazenê ke şarê ma zî bibo parçeyê nê şerî. Ganî şar pîya cuyêka demokratîke awan bikero. Ma tena seba kurdan ney seba pêro komelanê etnîk û dînîyan xoserîya demokratîke wazenê. Rejîmê Îranî bi nakokîyanê mabênê şaran payan ser de vindeno. Ma wazenê ke nê nakokîyan wedarnê. Ma wazenê ke sîstemêkê şargîr, demokratîkî û herêmî awan bikerê.’’