Korona ka menga peyêna kanûne de şaristanê Wuhanî yê Çînî de vila bi, heta şewa dişemeyî 101 welatan de 113 hezar û 500 kesî pê kewtî. Zafîyê înan Çîn de tewr tay 3 hezar û 996 kesî vîrusî ra merdî.

Goreyê eşkerayîya Rêxistina Weşîye ya Dinya (WHO) tehlûke roje bi roje bena zêdêr ke Covid-19 (Korona) bivurîyo ''pandemî''. Pandemî, pê janêko yew cografya de zaf hîra  beno vila yeno pênaskerdene. WHOyî pare kerd ke bi kontrolkerdişê Korona mumkîn o labelê asta tesîrê vîrusî yan zî pandemî nêna texmînkerdene.

Îtalya

Çîn de 80 hezar û 700 kesî pê Korona kewtî ame îdîakerdene ke welat de Korona yena ''kontrolkerdene.''Çînî ra dima Îtalya rêzê diyînî de ya ke Korona tewr zaf tesîrê ci kerd. Îtalya de 9 hezar û 172 kesî pê vîrusî kewtî û 463 kesî vîrusî ra merdî. Nika pêro Îtalya binê karantîna de ya.

Ewropa de vila beno

Korona Ewropa de zî vila bena. Paytextê Fransa Paris de 300 kesî pê Korona kewtî. Hûmara temame zî 1212 kesî ya. Welat de 25 kesî zî vîrusî ra merdî. Almanya de zî 1172 kesî pê Korona kewtî. 2 kesî zî Korona ra merdî. Îspanya de zî Korona lez vika bena. Welat de 1073 kesî pê Korona kewtî, 28 kesî zî Korona ra merdî.

Îran

Goreyê doneyanê fermîyan 7 hezar û 161 kesî Îran de pê Korona kewtî, heman wextî de 237 kesî zî Korona ra merdî.

Koreya Başûre

Koreya Başure zî Korona ra zaf tesîr gêna. Welat de 7 hezar û 478 nêweşê Korona estê û 53 kesî Korona ra merdî.

62 hezar nêweşî baş bîyî

Temamîya dinya de 113 hezar kesî pê Korona kewtî û înan ra 62 hezar û 500 kesî weş bîyî. Na rewşe hêvî dana pisporan.

Tesîrê Ekonomîyî kena

Yeno vatene ke zeraro ke vîrusê Korona (Covid-19) bide dinya do bi hezaran mîlyar dolar bibo. Goreyê cigêrayîşê peyênî yê Konferansê Averşîyayîşî û Ekonomîyî yê Neteweyanê Yewbîyayeyan ekonomîyê globalî yê emserênî de Covid-19î ra semed vînbîyayîş esto ke 1 ra heta 2 trilyon dolarî bibo. Cigêrayîş de ame vatene ke pîlîya ekonomîyî ya ke bi rêjê 3.4 ameyêne texmînkerdene do binê 2.5î de bibo.