Erkanê pêroyî Joseph Dunford û sefîrê taybetî yê Amerîka James Jeffrey zî tewrê zîyaretê Enqere yê John Boltonî bîyî.

Pêdîyayîşê Boltonî de bitaybetî derheqê qerarê Amerîka yê  Sûrîye ra antişê leşkeran de bazarîye ameye kerdene.

Şêwirmendê Asayîşê Neteweyî yê Amerîka yo ke roja Dişeme resa Tirkîye, roja Sêşeme bi vervatoxê Serokkomarê Tirkî Erdoganî Îbrahîm Kalinî ame têhet. Ama zanayene ke Erdoganî dir pêdîyayîş nêameyo viraştene.

QERARÊ LEZÛBEZ ANCÎYAYÎŞÎ AME VINDARNAYENE

Donald Trumpî menga Kanûne de nişka eşkera kerdebi ke ê do Sûrîye ra 2 hezar leşkeranê xo peyser biancê. Dimayo ke zaf reaksîyonî ameyî, ancîyayîş tayî şertan a ame giredayene.

Rojanê peyênan de Donald Trumpî mesajê ancîyayîşî zêdînayî. Trumpî 7ê Çile de  hesabê xo yê Twîtterî ser a da zanayene ke ê Sûrîye de hetêk ra vera DAÎŞî mucadele kenî û hetê bînî ra hedî-hedî ancîyenî.

ŞERTÊ NEWEYÎ YÊ BOLTONÎ

John Boltonî  roja Yewşeme zîyaretê xo yê Qudusî de da zanayene ke peyser ancîyayîş şertê pawitişê îtîfaqî ya giredaye yo. Boltonî vatbi ke heta ke Tirkîye garantîya asayîşê YPGyî medo, do ancîyayîş mebo.

ÎSTÎFAYÊ KE  RÎYÊ QERARÎ RA BÎYÎ

Qeraro ke Trumpî 19ê Kanûne de girwetbi, mabênê îtîfaqan de bibê sebebê pêrodayîşî. Sîyasetê zerê Amerîka zî kewtê têmîyan. Qerarî ra dima serede Wezîre Pawitişî Jim Mattis û wezîfedarê taybetî  yê Amerîka yê koalîsyonê mîyanneteweyîye yê vera DAÎŞî Brett McGurk çar  selahîyetdaranê payeberzan îstfa kerd.

PÊDÎYAYÎŞÊ MACRON Û TRUMPÎ

Verê zîyaretê Boltonî, roja Dişeme mabênê Serokkomarê Fransa Emmanuel Macron û Trumpî de derheqê Sûrîye de pêdîyayîşê telefonî ame viraştene.

ERDOGANÎ HADREYÎYA ÎŞXALÎ TEMAM KERDA

Serokkomarê Tirkî Erdoganî roja Sêşeme bi eşkerayîyêk vera Boltonî reaksîyon ramot û vat ke ma seba harekatî hadareyîya xo kerda û ma do wexto kilm de bikewê têgêrayîş.

YELEGZERDAN RA PKK BERPIRSÎYAR TEPIŞT

Erdogan bi naye zî qiymê xo nêard û çalakîya yelegzerdan ê Fransa ra zî PKK berpirsîyar tepişt. Erdoganî vat ke mîyanê  yelegzerdan de PKKyijî estî. Ma tîya ra vînenê. Ganî na raştîyê bêro vînayene. Siba welatanê bînan de zî do çîyê winayênî bibî.

LE MONDE: VERNÎYA PROJEYÊ TIRKAN AMEYE GREWTENE

Goreyê rojnameyê Le Monde  yê Fransa  eşkerayîyê ke Amerîka ra ameyî ‚‘gileyo ke artêşa Tirkî ser o bî birna‘.  Rojnameyo ke qefê îşxalê Tirkan vistî vîrî vat ke eşkerayîşê Boltonî vernîya  projeyê Tirkîye yê Sûrîye ( planê îşxalî) grewte.