Goreyê televîzyonê pêroyî yê Tanzanya, ferîbote vizêr gola Vîctorîa de awe ro şîye. Netîceyê aweroşîyayîşê ferîbote de tewr tay 70 kesî merdî.

Verfekê hukmatê Tanzanya George Nyamahayî va ‘Ferîbota ke awe şîya de 100 ra zêde kesî estbî’ û da zanayene ke beno ke hûmara merdeyan hîna zêde biba.

Walîyê herême John Mongelayî vizêr îzehetêk dayo û dîyar kerdo ke 37 kesî ameyî rizgar kerdene, labelê rewşa tayênan zaf giran a. Sebebê qezayî nîno zanayene, labelê wexto ke nê ferîbotî kapasîteya xo ra zêde bar kirişenî, qezayê winasî benî. Reyna seba ke êlegê rizgarîye kêmî yî û raywanî asnawe nêzanî, hûmara merdeyan zî zêde bena.

Serra 1996î de gola Vîctorîa de ferîbotêka bîne awe ro şîbî û o wext nizdîyê 700 kesî merdbî. Kanûna 2016î de zî qezayêk winasî bibi û netîceyê ci de 20 kesî merdbî. Rojnameyê The Stadardî yê Kenya Hezîrana 2016î de vatbî ‘hende sermayegozarîye seba gola Vîctorîa yenî kerdene, labelê na gole hîna zî tehlukeyin a’.