Hepsîyê sîyasî yê kurdî Zanyar Muradî û Luqman Muradî ke 2009 ra nata Îran de tewqîf kerde yî, bi cezaya îdamî ameyênê mehkeme kerdene.

Hepsîyê ke Zîndanê Recaîşarî de manenî û 5ê Êlule de girîyaybî hucreyanê yew kesan û ameybî aşkere kerdene ke do roja şeme înfazê hepsîyan bêro kerdene. Her di hepsîyê sîyasî yê kurdan ra ti xebere nîna girewtene.

KEYEYÎ: MA ETIRÎYENÎ

Keyeyê Zanyar û Luqman Muradîyî vernîya berê zîndanî de saete 3.00î ra nata vindetişê xo domnenî.

Keyeyan dîyar kerd ke ‘heta nika selahîyetdarê zîndanî ti xebere nêdaya înan’ û wina dewam kerdî: “Selahîyetdarî bi hîsanê ma kay kenî. Ge ma ra vanî ‘ameyî îdam kerdene’ ge zî vanî ‘nêameyî îdam kerdene’. Cok ra zerrîya ma rehet nîya û ma seba înan etirîyenî.”

‘MA NÊZANÎ KE BERDÎ KURA’

Avûkatê Zanyar û Luqman Muradîyî Salih Nîkbextî zî da zanayene ke rejîmê Îranî destur nêdayo ke o muwekkîlanê xo reyde pêvînayîşan bikero û wina va: “Ma nêzanî ke înan berdî kura. Her di muwekkîlê mi zî mehkeme ra qerarêko bîyaye hêvî kerdêne. Înan sey avûkatêkî mi ra nêvato berdî kura. Heta ke qerarê mehkeme nêbo, ez nêşena muwekkîlanê xo bivîna. Îxtîmalê vejîyayîşê nê qerarî zî çin o. Ganî dosya ewil bêra padayene, labelê dosya hîna nêameya padayene. Ganî ma her di ciwanan bipawî.”