Serekê Dewlete yê Rûsya Vladimir Putinî bi saeta Moskova  06.00d de vera Ukrayna operasyono leşkerî da destpêkerdene. Paytext Kiev û xeylêk lîmanan de teqayîşî qewimîyayî.

Wezîrîya Karanê Zereyî yê Ukrayna eşkera kerd ke îşxalêko xurt dîyayo destpêkerdene û  vat beno ke bi seyan leşkerê înan merdî. Goreyê bîlançoya verêne bombardumanê Rûsya de tewr tay 7 leşkerî merdî û 19 zî vînîbîyayeyê.

Serekkomarê Ukrayna Volodimir Zelenskî talîmat da ke wa artêşa ukrayna darba pîle bidê hêzanê rûsan ro û Wezîrîya Pawitişî ya Ukrayna zî veng da ke kam ke destê ci çeke tepişeno wa tewrê hêzanê leşkerîyan bibo.

Wezîrîya Pawitişî ya Rûsya zî da zanayene ke yewîyê Ukrayna mewzîyanê xo caverdenê. Hêzanê leşkerîyan ê herêmanê Donetsk û Luhanskî yê ke komara şarî îlan kerd da zanayene ke înan di bajarê qijî Stanytsia û Chtchastia fînayî dest.

Wezîrîya Karanê Zereyî da zanayene ke artêşa rûsî ver bi Milov û Horodychtchî aver şina. Reyna ame vatene ke herêmanê Khmelnytski û Dniproyî de embarê cepilxaneyî ameyî pirodayene.

Xeylêk ajansanê xeberan ramojna ke Kievî ra şar remeno.