UNICEF: Beno ke Covid-19 her roje 6 hezar domanan bikişo

Fonê Hetkarîya Domanan ê Neteweyanê Yewbîyayeyan (UNICEF)pare kerd ke têkoşînê vera vîrusê Korona beno ke welatanê xizanan de bibo netîceyanê xiraban û 6 mengan de her roje beno ke 6 hezar domanî bimirê.

UNICEFî eşkerayîyêke daye û bale ante 3 senaryoyanê xiraban ser o ke hetê Zanîngehê John Hopkinsî ra pêşkêş bîyî. Eşkerayîye ke senaryoya tewr xirabe ser o ame vindertene. Goreyê senaryo çarçewa têkoşînê vera vîrusê Korona de nêweşxaneyan de nêweş û nêweşîyê bînî ameyî peygoşkerdene. UNICEFî da zanayene ke bi nê hawayî beno ke mîyanê 6 mengan de 118 welatan de  her roje nêzdîyê 6 hezar domanî bimirê. Goreyê UNICEFî nê domanî do serra 5 ra qijêr bibê. Cara nê welatan de mîyanê 6 mengan de 2,5 domanê ke serra înan 5 ra qijêr a, mirenê.

UNICEFî eşkerayîya xo de ard ziwan ke heman sebebî ra beno ke 56 hezar û 700 cinîyî zî do bimirê. Rewşa nikayêne de cara 144 hezar cinîyî nê sebebî ra mirenê.

Mudira UNICEFî Henrietta Fore vat na bîlanço pê averşîyayîşê serran ê seba kêmkerdişê merge doman û cinîyan do biherimna. Fore îfade kerd ke ganî destûr nêro dayene ke cinîyî û domanî bibê qurbanê têkoşînê vera vîrusî.

Goreyê cigêrayîşêkê Kovara Tha Lancet Global Healt welatan de ke sîstemê weşîye yê înan qels o, janê Covid-19 zîncîrê peydakerdişê dermanan û destvistişê werdî asteng keno û çimeyanê malîyan û merdîmîye ser o teda keno.