Îran û Rojhelatê Kurdîstanî de serewedaritişê şarî dewam keno. Wendekarê zanîngehî bi xurtî mîyanê çalakîyan de cagênê.

Goreyê çimeyanê muxalîfan 193 şaristanan rê çalakîyî vila bîyê. Goreyê Rêxistina Heqanê Merdiman a Îranî çalakîyan de 27ê ci domanî 215 kesî ameyê qetilkerdene. Goreyê çimeyanê bînan zî çalakîyan de tewr tay 400 kesî ameyê qetilkerdene û 20 hezar kesî zî tepişîyayê.

Sere de Tehran, Şîraz, Gîlan û Manzandaran de xeylêk zanîngehan de wendekarî tewrê çalakîyan benê û dewleta Îslamî ya Îranî protesto kenê. Dima ke hêzanê dewlete eşt zanîngehê Şerîfî yê Tehranî ser û xeylêk wendekarî tepiştî wendekarî hîna zaf çalakîyan de cagênê.

Zanîngehê Behşîtî yê Tehranî wendekaran çalakîya roniştişî kerde. Zanîngehê Allameh Tabatabaî yê Tehranî de wendekaran ci sloganan çalakîye kerde. Zanîngejê Gilanî de zî sloganê wendekaran 'azadîye û têdûştîye' bi.

Şaristananê Seqiz, Sine û Mehabadî yê Rojhelatê Kurdîstanî de şarî adir vist ta û bi sloganê 'jin, jiyan, azadî' xoverdayîşî rê dewam kerd. Mabênê çalakîkeran û polîsan de alozîye vejîyaye. Sine de rejîmê Îranî çalakîkerî dayî guleyan ver û tay çalakîkerî birîndar kerdî. Sine de zî wendekarî bi sloganê 'Dîktatorîye rê ney' şîyî. Şaristanê Îlamî de rejîmê Îranî xeylêk çalakîkerî destbend kerdî.

Reyna Tehran, Bender Ebas, Xozista, Buşehir, Hurmuzgan û Faris  û Ebedan de nawnayîş û grevî dewam kenê.

Hetê bînî ra derheqê hêrişê rejîmê Îranî yê vera Zîndanê Evîne de bîlançoyêka zelale hema zî nêzanîyena. La çimeyê muxalîfî îdîa kenê ke zîndan de 30-40 tepişteyî kişîyayê.