Goreyê televîzyonê El Masîra ke girêdayeyê mîlîsanê Husî yo; teyarayanê şerî roja yewşeme qezaya Horanî ke girêdayeyê merkezê welayetê Bayda yo, bombe kerd.

Televîzyonê El Masîra dîyar kerd ke hêrişî ver camêrdêk, 4 cinîyî û 2 domanî merdî. Ajansê Sabaye zî bîlançoyêka cîyaye da. Goreyê Saba tewr tay 10 kesî merdî.

Yemen de tebaxa 2014î ra nata şer esto. Paytextê Yemenî Sana û herêmêka hîra destê mîlîsanê Husî de yî. Adara 2015î de Koalîsyonê Ereban mudaxaleyê Husîyan kerd û şer xorî bi. Hetêkê şerî de Husîyî û Îrano ke destek dano înan estî, heto bîn de zî hêzê Serekkomarê Yemenî Abd Rabbu Mansur Hadîyî û Koalîsyonê Ereban estî. Şerî ver heta nika xeylê zaîyat virazîyayo û nika lazimîya se ra 75ê nufusî bi hetkarîye û pawitişî esta.

Tena feqîrî û vêşanîye ver nê, nêweşîya sey Kolera ver bi hezaran kesî merdî. Heto bîn de bi sîlehê qedexekerdeyan sucê şerî yenî kerdene. Goreyê Milletê Yewbîyayeyî heta nika nizdîyê 10 hezar kesî merdî û 53 hezar kesî zî birîndar bîyî.