Sazîya komelî ya sivîle ya bi nameyê Domanan Bipawe (Save The Children) eşkera kerd ke şerê mîyanênî yê Yemenî de beno ke 85 hezarî domanê ke binê 5 serrî de yî nêweşî yan zî vêşanî ver o merdê.
Şerê Yemenî ke sey ‘şero vîrkerde’ zî yeno namekerdene de mexdûrîyet her roje hêna beno giran.
Vengdayîşê rêxistinanê merdimayîye ver o zî Yemen de şerê mîyanênî û pêrodayîşî dewam kenî. Goreyê raporê sazîyê komelî yê sivîlî yê mîyanneteweyî û Neteweyê Yewbîyayeyî ke herême de xebatan kenî, rewşa ke Yemen de esta vejêna çiman ver.
Sazîya komelî ya sivîle ya bi nameyê Save The Childrenî ya ke heqê domanan pawena, bi raporo ke eşkera kerd de bale ante tesîrê şerê mîyanênî yê Yemenî yê domanan ser o.
Rapor de ameye texmînkerdene ke Yemen de mabênê tarîxanê Nîsana 2015î û Teşrîna verêna 2018î de 84 hezarî û 701 domanê ke binê 5 serrîye de yî vêşanî yan zî nêweşîye ver o merdî.
Rêxistine vat ke, ‘Ma sey organîzasyon derheqê babete de xebatê Neteweyê Yewbîyayeyî şuxulnayî.’
‘EKE BÊRO WAŞTENE DO VERNÎ BÊRO GIREWTENE’
Dîrektorê Save The Childrenî yê Yemenî Tamer Kirolosî da zanayene ke şer û mexdûrîye ke şerî ra pey destpê kerdî, her roje domanan kişenî û vat, eke bêro waştene do vernîya na rewşe bêro girewtene.
Kirolosî bale ante şaristanê lîmanî Hudeyde yo ke pêrodayîşî uca de zêde qewimyenî û vat, ’cuya 150 hezarî domanan tehluke de ya’ û wina dewam kerd, ‘Merdimî verê çimanê xo de benî şahidê helîyayîşê domananê xo.’
Yemen de rewşe tena seba domanan nê seba pêroyê şarî zî felaket o. Goreyê Neteweyê Yewbîyayeyî uca krîzo tewr pîl ê dinya qewimîyeno. Nêmeyê nifûsê Yemenî yanî 14 milyonî Yemenijî xela de yî.
Berpirsîyarê Komîteya Xaçê Sûrî a Mîyanneteweyîye Carlos Batallasî, Aden de Reutersî rê qisey kerd û vat ke, ‘Xebatê ke ma merkezanê weşîyan ê cîya cîyayan de kerdî , înan ma dî ke rewşa ke esta rewşa felaketî ya merdimayîye ya, naye tena werdê xirabî ver o nêqewimîyena.’
Adara 2015î de paytext Sana kewt destê milîsanê Şiî Husîyan û dima ra bi beşdarîya Erebîstana Suûdî şerê mîyanênî dest pêkerd, heta nika şer de 10 hezarî sivîlî merdî. Mîyanê 4 serranê peyênan de hezaran kesî nêweşî û janî ver merdî, milyonan kesî zî bîyê mehkûmê vêşanîye.
WASHINGTON: MUZAKEREYÎ SEREYÊ KANÛNE DE YÎ
Heto bîn ra Wezîrê Pawitişî yê Amerîka Jim Mattîsî, derheqê şerê Yemenî de vat, do muzakereyî sereyê menga Kanûne de Swêd de destpê bikerî. Goreyê Mattîsî, Erebîstana Suûdî û Emîrîyê Yewbîyayeyî yê Ereban ê ke aktorê şerê Yemenî yê, hetkarî danî muzakereyan.
Muzakereyî do mabênê hêzanê hukmatî ke Koalîsyonê Ereban ra hetkarî gênî û milîsanê Husîyan ke Îranî ra hetkarî genî de bêrê kerdene.
