Goreyê Rêxistina Efû ya Mîyanneteweyîye tewr tay 8 zîndananê Îranî de bi hezaran tepişteyê ke rîyê janê vîrusê Korona ra qerqilîyenê çalakîyî protestoyî kerdî û raştê hêrişî ameyî.

Rêxistina Efû da zanayene ke gardîyanan û hêzanê asayîşî hêrişê tepişteyan kerd, guleyê raştî û bombayê gazî şuxulnayene. Nêtîceya hêrişan de tewr tay 35 tepişteyî ameyî kiştene û nizê 100 tepişteyan zî birîndar bîyî. Eşkerayîye de ame vatene ke ganî selahîyetdarê Îranî qesawetanê tepişteyan ê vera Korona werte ra wedarê la ê herinda naye de hêriş kenê, çîyo winayên nîno qebûlkerdene. Ganî heyetêko xoser bêro raameyene ke berpirsîyarê merg û îşkenceyê zîndanan vejîyê verê edaletî. Rêxistina Efû waşt ke selahîyetdarê Îranî de cadê bêşert heme tepişteyanê sîyasîyan veradî.

29ê adare de Wezîrîya Edaletî ya Îranî dabi zanayene ke mabênê 19ê adare û 3ê nîsane de 100 hezar tepişteyî do semedê 2 hewteyan vejî teber. No qerarêko semedê tedbîrê vera Korona amebi girewtene heta 19ê nîsane ame dergkerdene.

Goreyê reqemanê fermîyan Îran de 4 hezaran ra zafêr kesî rîyê Korona ra merdî la goreyê çimeyanê muxalîfan 242 bajaran de 22 hezaran ra zafêr kesî merdî.