12 dezgehanê cinîyan seba Gulîstane Şaylemez eşkerayîye daye

Dezgehanê cinîyan ê Ewropa seba Gulîstane Şaylemeza ke 15ê sibate de Amed de hetê birayê xo ra kişîyaye eşkerayîye daye. Dezgehan vat: ''Gulîstana ke domanîye de dîyaye zewijnayene, bîye qurbana kanwazîya keyeyî.''

15ê sibate de Gulîstane Şaylemez Amed de hetê birayê xo ra amebî qetilkerdene. Gulîstane dadîya çar domanan bîye û hema ke doman bîye pê zorê keyeyê xo zewijîyaye.

12 dezgehanê cinîyan ê Ewropa seba Gulîstane eşkerayîyêka hempare weşanaye. Cinîyan serebût şermezar kerd û îfade kerd ke hîşmendîya dewleta tirke û yê camêrdan heman a kiştox a. Cinîyan da zanayene ke seba ke Gulîstane mêrdeyî ra cîya bîya û waştêne xo rê cuyêka cîya awan bikera kişîyaye.

Cinîyan pare kerd ke ganî kurdî na hîşmendîye vindarnê ke Gulîstane bîye qurbana kanwazîya keyeyî.

Cinîyan vat: ''Şîdet têna cinîyan rê nê şexsê cinîyan de pêro komelî rê yeno kerdene. Şîdetê vera cinîyan meseleya bingeyîne ya pêro cinîyan a. Seba çareserkerdişê na mesele ganî cinîyî bibê yew. Qirkerdişê cinîyan resa asta qirkerdişê cînsî. Coka ma hewceyê têkoşînê rêxistinkerdeyî yê. Ma qirkerdişê cinîyan de qet yew bahane qebul nêkenê. Kamî bira qirkerdişê Gulîstane dayo wa bêro hukmkerdene.''

Nê dezgehan morê xo da binê eşkerayîye:

Tevgera Jinên Kurd li Ewropayê, Meclîsa Jinê ya Desdan, Dziewuchy Berlîn, Women Defend Rojava-Elmanya, Partiya Femînîst Dîe Fraûen, Yekîtiya Xwendekarên Jin ên Kurd, Meclîsa Jinê ya Êzidî ya Binevş a Berlînê, Meclîsa Jinê ya Ûta-Dresden, Yekîtiya Jinên Sosyalîst û Yekîtiya Jinên Koreyî Trostfraûe