Seba Gulîstane Dokuya ke tira 5ê çeleyê 2020î ra nata xeberêke nêna girewtene cinîyan çalakîyî kerdî û waşt ke wa mesuldarî bêrê cezakerdene.

Dêrsim de serkêşîya Platformê Cinîyan ê Dêrsimî de Meydanê Palavara ra heta Meydanê Seyîd Rizayî çalakîyêka rayraşîyayîşî ameye kerdene. Rayraşîyayîşî ra dima eşkerayîye ameye wendene. Eşkerayîye de pankarta '1095 rojî yo Gulîstane ra xebere çin ', 'Gulîstane kamca de ya' ûsn ameyî akerdene. Keyeyê Dokuyî û wendekarê Zanîngehê Munzurî zî tewrê çalakîyî bîyî. Nameyê platformî ser o Eylule Yantemur metnê eşkerayîye wend.

Eşkerayîye de ame vatene ke tehqîqatê serebûtî bi hawayêkê xurtî nêno kerdene û vergumanî nênê tepiştene. Eşkerayîye de ame parekerdene ke sûcdarî nê la keyeyê Gulîstane raştê destbendkerdiş û cezayan yenê. Eşkerayîye de ame îfadekerdene ke cinîyî tim do aqîbetê Gulîstane Doku pers bikerê.

Îzmîr de zî qezaya Bornova de seba Gulîstane Doku rayraşîyayîşêk ame kerdene. Rayraşîyayîş de dowîzî ameyî akerdene û sloganê sey 'Gulîstane Doku kamca de ya' ameyî vatene. Rayraşîyayîşî ra dima eşkerayîyêke ameye wendene.  Eşkerayîye de ame vatene ke seba Gulîstane xebatê cigêrayîşî yê bitesîrî nênê kerdene û sûcdarî nêtepişîyayê. Çalakîye de mesajê 'Gulistane Doku serewedaritişê ma ya' ame dayene.