Amed de cinîyî emser herinda qrenfîlan de bîlezîkê ke înan viraştî do vila bikerê. Aktîvîstê Têgêrayîşê Cinîyan ê Azadan (TJA) seba viraştişê bîlezîkan bînaya MEBYA-DERî de ameyî pêser.  Aktîvîsta TJA Medîne Efe wexto ke viraştişê bîlezîkan dewam kerdêne îfade kerd e seba ke keda cinîyan bêra verê çiman ê do 8ê Adare de bîlezîkan vila bikerê.

 Efe vat: ''Ma nê bîlezîkan hem cinîyanê tepişteyan rê bierşawê hem zî cinîyanê kedkaran rê vila bikerê. Ma venga embazanê cinîyan da û ma tîya de ameyî pêser. Ma bi na xebate armanc kerd ke hem nê bîlezîkî sey dîyarîye cinîyan de bimanê hem zî ma keda cinîyan bimojnê her kesî.''

Efe venga cinîyan da û vat: ''Ma Roja Cinîyan a Dinya ya 8ê Adare de Meydanê Îstasyonî de bi rengê xo, vengê xo û zilgitanê xo bêrê pêser. 8ê Adare seba ma zaf girîng o. Ma venga cinîyan û ciwanan danê ke bêrê tewrê ma bibê, ma 8ê Adare bi hawayêkê girseyî fîraz bikerê.''