Şaristanê Toronto yê Kanada de, Komunê Cinîyan ê Azadan ê Sara bi hîrê çalakîyan 8ê Adare fîraz kerd.

Toronto

Fîrazşayîye de Sûna Alan û hunermenda herêmîye Gokçe vejîyayî sehne ser. Koma tîyatroyî ya cinîyan a rayberîya Leyla Batkî berhemê xo pêşkêş kerdî. Hemsereka KCDyî Leyla Guven zî mesajêk erşawit fîrazşayîye. Fîrazşayîye de kincê herêmî yê Kurdîstanî zî ameyî mojnayene. Hetê bînî ra rayraşîyayîşê IWDyî ame kerdene ke Komunê Cinîyan ê Azadan ê Sara zî mîyanê komîteya amadekarîye de bi. Cinîyî kuçeyanê Toronto de rayîrî ra şîyî.Şaristan de resepsîyonêk ame kerdene û sînevîzyonêk ame mojnayene.

Tambov

Cinîyê kurdî qezaya Miçurinskî ya şaristanê Tambovî ya Rûsya de seba fîrazşayîya 8ê Adare Roja Cinîyan ê Kedkaran a Dinya kom bîyî. Endama Têgêrayîşê Cinîyan Fatma Arîn qisey kerd û bale ante girîngîya 8ê Adare ser. Arîne pare kerd ke cinîyanê kurdan sayê îdeolojîyê azadîya cinîyan ê Rayberê Şarê Kurdî Abdullah Ocalanî têkoşînê xo xurt kerd û wayîrê estbîyayîşê xo vet.Fîrazşayîye de hunermende Bêrîvane Colemêrg, Delîle Lezgîev û Nuredîn Xadjiyev, Mamed Usenov, koma domanan ''Şehîd Barîn'' vejîyayî sehne ser û hunerê xo pêşkêş kerdî. Fîrazşayîye bi govendan qedîyaye.