Ambargoyê serê Kampa Koçberan a Şehîd Rustem Cûdî ya Mexmûrî  roja 48’ine dewam keno. Rixmê heme hewldayîşan PDK û parlamento semedê wedartişê ambargoyî gamêk nêeşte.

1’ê Êlule de Dayîkanê Haştîye yê Mexmûrî ra grûbêk waşt ke vera ambargoyî şirê Hewlêr û îdarekaranê Asayîşê Hewlêrî dir pêvînayîş viraze. La dayîkî dekewtişê bajarî de hetê hêzanê asayîşî ra ameyî vindarnayene û raştê hêrişî ameyî. Dayîkî hîrê rojî yo ke nuqtaya kontrolî de çalakîya roniştişî virazenê. Dayîkan ard ziwan ke heta wedartişê ambardoyî ê do çalakîya xo rê dewam bikerê.

Grûbeka doktoran waşt ke dayîkê ke pîr ê û çend şewe yo teber de kartonan ser o rakewenê kontrol bikerê, la hetê asayîşê PDK’yî ra ameyî astengkerdene. Doktoran bi eşkerayîyêka çapemenîye vera tewirê PDK’yî reaksîyon da. Dr Medya Almanî ya ke eşkerayîye wende va: ‘‘ Ma eşnawitê ke dayîkêk nêweşa û waşt ke aye kontrol bikerê. La asayîş desûr nêda ma. Çîyêko winayên nêno qebûlkerdene. Ma sey doktoran nê tewirê PDK’yî şermezar kenê. Ganî weşîye sîyasetî rê mebe alet. Weşîya merdime/î her çî ra zafêr muhîm a. Ma înan ra va, eke çîyêk nêweşanê ma bibo ma do hesabê naye înan ra bipersê.‘‘