Kongreya 12ine ya PKKyî mabênê 5-7ê gulane de Herêmanê Pawitişî yê Medya de amebî kerdene. 

Ronayoxanê PKKyî ra Duran Kalkanî kongre de qiseykerdişo peyên kerdibi. Kalkanî nê çîyî ardîbî ziwanî:

‘’Ma nê hîrê rojan de bingeyê perspektîfê Rayber Apoyî de nîqaşê girîngî kerdî, birê girîngî dayî. Nê birî do têkoşînê azadîye yê Kurdîstanî ser o prosesêkê neweyî bidê destpêkerdene. Ma bi na kongre verê ney akerd. 

Têkoşîno ke nê esasî ser o do bêro kerdene, wa ser bikewo. Ma hêvîdar ê ke birê ma do şarê kurdî, cinîyan, ciwanan, şaranê rê edalet, têdûştîye, holîye, rindîye bîyarê û bibê wesîleya azadîye.

Feshkerdişê PKKyî nêno manaya yew çinbîyayîş, qedîyayîş, pûçbîyayîş, mergî; eksê ci yeno manaya akerdişê berê xoverdayîşê newîyêrî, bitesîrêrî, raştêrî, bihêzêrî û awankerdişê zemînê ney.

Bê Kongreya çarine ez tewrê pêro kongreyan bîya. PKK heta ewro bi hêz, xîret, kedê Rayber Apoyî çin nêbi. PKKyî ra nêbîyêne serkewtişo winayên do çin bîyêne, kurdayetîye do nêmendêne. Coka ma seba ronîyayîşê PKKyî vanê ‘ganîbîyayîşê kurdan.’ PKKyî ra nêbîyêne Tirkîya de çepê tirkan zî do nêbîyêne. Nê pêro netîceyê têkoşînê PKKyî de bîyî. Eke Tirkîya de hêvîya demokratîkbîyayîşî est a, na xêrê PKKyî ra ya.

Wexto ke Sovyetî rijîyayî Rayber Apoyî sosyalîzmo reel kirişt PKKyî. Eke ewro dinya de qalê sosyalîzmî yeno kerdene, no xêrê ercnayîşanê Rayber Apoyî ra yo. Ewro dinya hêzê xo yê fikirîyayîşî, hişmendîye û çalakîkerdişî Rayber Apoyî ra gêna. 

Coka cinî, ciwan, bindest û şarî wayîrê Rayber Apoyî vejîyenê û seba azadîya ey hemle aver benê.

Hişmendîya ekolojîke zî, azadîgîrîya cinîyan zî bingeyê teorîya Rayber Apoyî de aver şinê. Modernîteya demokratîke, komelo demokratîk mîyanê paradîgmaya Rayber Apoyî de ganî benê. Coka paradîgmaya Rayber Apoyî seba kurdan bîye mîlad; kurdî rêxistin kerdî.

PKKyî têkoşînê vera polîtîkayanê asîmîlasyon û îmha vilayê pêro Kurdîstanî kerd, da sîstemê kolonyalîstî ro. Coka her kesî zî têkoşînê PKKyî ra îlham girewt.
Ganî ma nê kerdişanê PKKyî hol fam bikerê, mîrasê PKKyî bi raştî vilayê dinya bikerê. Ganî ma mîyanê tayê netîceyan de teng nêbê. Feshkerdiş û qedînayîşê têkoşînê çekdarî. Nê yenê çi mana? Eke ma bi raştî wayîrê nê biran vejîyê û bîyarê ca ma ganî bivînê ke çi bikewo destê ma. 

Nê pêroyî hetê Rayber Apoyî ra do bêrê rayberdene. Ganî ma ey bipawê. Milîtanê dewrê neweyî ganî sosyalîzmê komelê demokratîkî aver berê. Ma kenê ke oyo ke verî nêameyo kerdene bikerê. Erkê ma teba qerargirewtiş nîyo; caardişê nînan o. Yanî vurîyayîş ganî ma ra dest pêbikero. Ma bi qeraranê xo verê newebîyayîşan akerd la no zî pabesteyê newebîyayîşê ma yo. Ganî ma bingeyê paradîgmaya Rayber Apoyî de xo bivurnê û çew teberê ney de nêmano.

Nika her wextî ra zafêr erk û mesuldarîyê ma est ê. Êyê ke armancanê Rayber Apoyî rind fam kenê, karê tewr raştî bikerê. Ganî ma cinî, ciwan, şar û bindestan naye ser o rêxistin bikerê.

PKK xo fesh bikero zî fikrê PKKyî qetî fesh nêbeno. PKK yew têgêrayîşê Rayberîye yo. Xora Rayberîye zî bi qiseyanê xo vat ke erk û mesuldarîyê ma nêkêmîyayê, zêdîyayê.

Ganî ma qetî xo vîr a nêkerê ke dişmenê ma partîyêka sîyasîye yan zî hêzê neteweperestî net sîstem bi xo yo. Xo vîr a mekerê ke no dişmen do tim hêrişê ma bikero. Beno ke dişmen ho xîleyan keno; çunke verê cû zî kerd. Naye ra ganî ma tim hişyar, baldar û bihêz bibê û têkoşînê xurtî bikerê. 

Ma do vurnayîşêk û vurîyayîşêkê xurtî bikerê. Ma do ney bi famkerdişê Rayberîye bikerê. Nê prosesî de embazîya raştikêne zaf girîng a. Ganî ma hêz bidê, destek bidê yewbînan, dîyalog bikerê. Ma bi embazîye resayî nê rojan. Rêxistinbîyayîş bi xo embazîye ra derbaz bena. 

Ganî ma Apocîtîye bikerê terzê cuye, wina biciwîyê. Esasê PKKyî xora caardişê Apocîtîye yo. 

Birê na kongre hê dewrêkî qedînenê, berê dewrêkê neweyî akenê. Hêzê dişmenî do nêeşkê verê ney bigêrê. Ma do pêro hêrişan bişiknê. Ma do seba serkewtişê nê prosesî seferber bibê. 

Caardişê biranê na kongre do firsend bibo Rayber Apoyî ke o bi xurtêrî têbigêro. Coka ganî ma biranê kongre hol fam bikerê. Rayber Apoyî vat ‘Sosyalîzmê Komelê Demokratîkî.’ Kongreya ma do verê ney abikera.

Ma pê bawer ê ke netîceyê na kongre do prosesî aver berê. Nê esasî ser o ma bawer kenê ke her kes tewrê raştîya Rayberîye bibo. Ma venga pêro embazan danê ke bi aktîfî tewrê nê prosesî bibê, Rayberîye hol fam bikerê, hîna zaf yew bibê, Apocîbîyayîşî bihêzêrî bîyarê ca. Ma pêro embazan rê serkewtiş wazenê. Ma şehîdanê ma yê qehremanan bi rêz û minetî yad kenê. Ma verê Rayber Apoyî de bi hesrete û rêzî sereyê xo anê war.’’