Grevê vêşanîye yê ke rayberîya Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî dest pêkerdî 1’ê Adare ra nata heme zîndanan ra vila bîyî. Çalakwanan vizêr da zanayene ke 15 xoverdayoxî do çalakîya xo biaçarnê rojeyê mergî. Çalakwananê grevê vêşanîye ra yew zî Mehmet Yildirim o.

Dayîka Mehmet Yildirimî, Hazal Yildirime ard ziwan ke lajê aye bîlasebeb hema ke 17 serre bi ame tepiştene û 10 serrî yo ke Zîndanê Bafra de yeno tepiştene û semedê wedartişê tecrîdî 61 rojî yo grevê vêşanîye de yo û va: ‘‘Lajê mi  10 kîlo bîyo zehîf û rewşa weşîya ci çend şino xirab bena. 6 embazê ci ke 136 rojî yo grevê vêşanîye de yê halê înan hîna xirabêr bîyo. Ma nêwazenê ke kesêko bîn cuya xo vînî bikero. Coka tecrîd ganî cade bêro wedartene.‘‘

Dayîke Yildirime waşt ke vera grevê vêşanîye wa bêvengîye biqedîyo û wina dewam kerd: ‘‘Domanê ma her roje zîndanan de helîyenê, la çalakîya xo de biqerar ê. Vanê ‘ma bi tabûtî zî vejê teber ma do çalakîya xo rê dewam bikerê‘. Êdî bes o! rewşa domananê ma merheleya krîtîke zî ravêrt. Ganî her kes derûdorê tepişteyan de çember bo. Ganî tecrîdê serê Rayber Apoyî cade bêro wedartene. Domanê  ma game bi game şinê merg. Seba ke hukmat wezîfeyê xo bica bîyaro, ganî her kes wirzo lingan ser, çew bêveng memano.‘‘

Yildirime da zanayene ke ê heta peynî xoverdayîşê domananê xo rê wayîr vejîyenê û qiseykerdişê xo wina qedîna: ‘‘Ma dayîkî, zerrîya ma vêşena. Heq, huqûq û aşitî ra wetêr ma çîyêk nêwazenê. Wa hinî nê herran de hesrê dayîkan merişî. Wa hinî zîndanan ra tabûtî mevejîyê. Hukmatî domanê ma esîr girewtî.  Ma hinî nêeşkenê înan vînî zî. Tecrîd tena Îmrali de nê heme şaran ê Tirkîya rê yeno bicaardene. Eke tecrîdê Îmraliyî wedarîyo, tecrîdê serê domananê ma zî yeno wedarnayene. Ma tena cuyeyêka bihuzûr û bianor wazenê.‘‘