Wekîla HDPyî ya Şirnexî Nurane Îmîr ê kesan ra yew bîye ke serra 1992î de Newroze taxa Cûdîyî ya Cizîre de pêşwazî kerde, fîraz kerde û bîye hedefa hêrişê hêzanê dewlete. Wekîla HDPyî Îmîre qala Newroze ya ê çaxî kerde.

Îmîrî vist vîrî ke Newroze  leşê Mazlûm Doganî, Zekîye Alkan, Rahşane Demîrel, Sema Yuce, Ronahî û Bêrîvane de her wisar de bi mîlyonan merdiman de şîn bena û vat: ''Coka her wisar seba kurdan newe ra ganîbîyayîş o. Adirê azadîye leşê înan de zî do qet nêmiro.''

Îmîra ke serranê 1990î de beşdar û şahîda fîrazşayîyanê Newroze bîye wina qala ê çaxî kerde: ''Cizîre de goreyê tradîsyonê Newroze şar ver bi goristanî şî. Nê tradîsyonî dima ke 5ê çeleyê 1991î de kesêk keyeyê xo de ame qetilkerdene dest pêkerd. 18ê adare de her taxe de adirê Neroze ameyêne wekerdene û koman heta şewe gobendî girewtêne. Ez serra 1992î de taxa Cûdîyî de mîyanê komêke de bîye. Merdimî ameybî pêser û înan govend girewtêne. Sere de Otêla Keremî serê her banî û kargehî ra fîşekî ameyî eştene. Bi seyan merdimî birîndar bîyî, bi desan merdimî verê çimanê ma de dinyaya xo bedilnaye. Pêro şarê Cizîre teber de bi, ez û keyeyê mi zî...

Newroze vera înkarî û qedexeyî serederatiş bîye. Girseyê ê çaxî roje bi roje bi pîlêr. Se kerd zî adirê Newroze her wisar geş bi.''

Emser Korona ra ma do reya verêne Newroze  bi girseyan fîraz nêkerê. La ni girseyan nêbo zî ma do her ca de adirê Newroze bivisnê ta. Bi tavistişî û hewnakerdişê çilayan zî bibo, bi tavistişê kîbrîtan zî bibo ma do wayîrê tradîsyonê Newroze bivejîyê.''