Namzeda hemserekîya HDP’yî ya Şaredarîya Bagcilarî ya Stenbolî Huda Kaya vat ganî bedelê ke grevanê vêşanîye de yenê dayene bêrê famkerdene û seba hîsdarîye veng da.  Maye Aşitîye Kûmrû Akgule zî ard ziwan ke no faşîzm ganî bêro vindarnayene û vat, “Her roje yew cenaza danê ma. Qedera ma Kurdan na nêya.” Endama Meclîsê Partîye yê HDP’yî Ayşe Berktaye zî vat ke seba ciwînayîşê Leyla û hemrayanê aye ganî mucadele bêro xurtkerdene.

Huda Kaya, maye aşitîye Kûmrû Akgule û endama Meclîsê Partîye yê HDP’yî Ayşe Berktaye derheqê grevanê vêşanîye de ANF’yî rê qisey kerd.

Kaya bale ante ke kîşta grevanê vêşanîye de hendî zîndanan ra cenazayî zî vejênê û îqtîdar krîtîk kerd. Kaya vat, “Îqtîdarî heta ewro tim hemverê anorê merdimîye de, ercanê azadîye de, estbîyayîşî de, cuye de û aşitîye de şer kerd. Hendî cimat zaf tengizîya yo. Nê mergê ke pêser o ameyî peyamêk danê. Ganî no peyam bêro famkerdene. Seba demokratîkbîyayîş, azadî û huzûrê welatî ganî tecrîd gamêk verî bêro wedaritene. Ganî nê bedelî bêrê famkerdene. Seba abîyayîşê vernîya demokratîkbîyayîşî û helmgirewtişê cimatî ganî gamî bêrê eştene. No şîyayîş şîyayîşêko rind nêyo.”

‘Çare Wedaritişê Tecrîdî Yo’

Maye aşitîye Kûmrû Akgule zî vat ke muhîm o ke şar heta peynî paştî bido xoverdayîşo ke bi serkêşîya Leyla Guvene dewam keno û vat çareyê nê zî wedaritişê tecrîdî yo. Akgule nê vatî: “Grevê vêşanîye tena bedenan dir eleqedar nêyê, nê grevî seba ameyîşê aşitî û wedaritişê tecrîdanê ke serê cuya merdiman de yenê bicaardene yenê kerdene. Ganî ma nê faşîzmî vindarnê. Her roje yew cenaza danê ma dest. Qedera ma Kurdan na nêya. Eke her şar qedera xo bewlî keno ma do zî goreyê nê rayîrêk bidê qedera xo. Ma bibê yew. Ma vengê xo resna dinya la ma xomîyan de nêeşkenê vengê xo biresnê yewbînan. Ganî Kurdî seba nê grevan hîsdar bibê.”

‘Ganî Ma Mucadeleyî Bikerê Pîl’

Endama Meclîsê Partîye yê HDP’yî Ayşe Berktaye vat ke ê seba înanê ke grevê vêşanîye de yê, Leyla Guvene û hemrayanê aye bidê ciwînayene û tecrîdî wedarê mucadele kenê û vat hemverê çalakîyanê fedaîyan de xeylî bêçare manenê. Berkaye vat, “Helbet ma mucadeleyê cimatkîyî, muxalefetî û mucadeleyê seba wedaritişê tecrîdî kenê xurt labelê ganî çalakîyê fedaîyî vinderê. Grevê vêşanîye xora xoverdayîş o, mucadele yo.”