Besê Anûş serra 1960î de qezaya Pazarcixî ya Gumgumî de dadîya xo ra bîye. Qirkerdişê Gumgumî ra dima serra 1978î de tewra PKKyî bîye. 17ê adara 1981î de Gumgum de operasyonêkê dewleta tirke de wefat kerd. Besê Anûşa ke şehîda verêne ya cinîye ya PKKyî bîye, vurîyaye sembolêk. Embaza aye Elîfe Ronahî ANFyî rê qala Besê Anûş kerde.

Ronahî ard ziwan ke serrê verênî yê PKKyî seba cinîyan zehmet bîyî û vat: ''Komelî awil tewrbîyayîşê cinîyan ê PKKyî qebul nêkerdêne. Netîceya têkoşînêkê bêhempayî de tay averşîyayîşî ameyî meydan. Êyê ke reya verêne tewrê PKKyî bîyî roşnvîrî bîyî, bi giranî wendekar û ciwanî bîyî; Embaze Sara, Sakîne Karakoçan, Turkane Derîn, Besê Anûş, Azîme Demîrtaş, Sultan Yavuz, Rahîme Kahraman, Hanim Yaverkaya, Sakîne Kirmizitoprak, Saîme Aşkin. Embaze Besê dima ke tewra PKKyî bîye wextêkê kilmî de şehîd bibî zî tewirê ci tesîr3e averşîyayîşê cinîyan kerd. Tesîrê ewnîyayîşê cinîyan, gerîlayan kerd.

 Embaze Besê Qirkerdişê Gumgumî ra dima tewra PKKyî bîye. Nê qirkerdişî aye rê zaf tesîr kerdbi û coka kewte mîyanê cigêrayîşan. Qirkerdişê Gumgumî ra dima Besê bire daye ke hînî bi hawayêkê aktîfî tewra têkoşînî biba. Na çarçewe de Besê şîye zaf dewane Pazarcikî, dewan de şarî reyde, bi taybetî zî cinîyan reyde xopawitişî ser o kombîyayîşî kerdî. Dewan de perwerdeyê çeke da cinîyan. Embaze Besê seba ke şehîda verêne ya cinîye ya têgêrayîşî bîye seba ma sey binge ya. Nêzdîye hîrê mengan ma mezrayan d pîya bîyî. Besê tim tesîrê mi kerdêne. O çax fermandarê ma camêrdêk bi. La Besê tim fikrê xo, vînayîşê xo ardêne ziwan. Zaf girîngîye dayêne ke şar perwerde bikera.  Embaze Besê şewêke notêk erşawitbi vatêne; 'Hînî ez do nêmana, bêrê mi berê.' Ez û embazêk ma kewtî rayîr. Besê dewan de şarî reyde kombîyayîş kerdêne. Ma reyna kombîyayîşêk serûber kerd. O çax dewlete qanûnêk vetbi, vatêne her kes çeka xo bido dewlete. Dewijan ma rê vat ke ê do çeka xo bidê ma.

Ma çekî girewtî û cayêk de erd kinit binê erdî de nimitî. Şîwanêkî ma dîyî. Ma şîwanî rê vat ke eke o gerrayê ma bikero, ma do hesabê naye bipersê. Şîwanî vat o do nêkero. La kerd. 17ê a menge de dişmenan dormeyê ma girewt. Serê sibayî saete mabênê 5-6an de embaze Besê pê hesîyaye ke dişmenî hê yenî ma serî. Aye ma hîşyar kerdî. Ma cayê xo ra weriştî û remayî. Dima ke nişka ra vengê guleyan ameyî ma vengê dişmenî eşnawit. Vatêne; 'Teslîm bibê.' La ma teslîm nêbîyî. Ma têna xîret kerdêne ke dormegirewtişê leşkeran ra xo bixelisnê.  Dişmenan ez û embazê bînî esîr girewtî û embaze Besê zî şehîd bîye. O çax tewr tay 3 hezar kesî tewrê cenazaya embaze Besê bîyî. Pazarcikî ra heta dewa Besê şarî cenazaya ci pê rayraşîyayîşî berde.  Seba vîrameyîşê embaza Besê artêşbîyayîşê cinîye ame awankerdene, KJK ameye awankerdene, partîya cinîye ameye awankerdene. Nê pêro cewabê wasîyetanê şehîdan ê verênan ê cinîyan ê partî bîyî.''