Têgêrayîşê Cinîyan ê Azadan (TJA) 15ê êlule de vera tecrîdê Îmraliyî, qirkerdişê sîyasî, tacîz, tecawuz û tedayan Kampanyaya 'Ma xo pawenê' dabi destpêkerdene. Çarçewa kampanya de xebatê TJA dewam kenê. 

Aktîvîsta TJA Hatîce Şen derheqê kampanyaya înan de ANFyî rê qisey kerd.

Şene wina qala kampanya kerde: ''Kurdîstan de kulturê têkoşînî yo qedîm esto û no kultur kokê xo xopawitişî ra gêno.  Têkoşînê 40 serran ê cinîyan de xeylêk destkewteyê bêhempayî vejîyayî werte û hetê bînî ra dişmen seba ke nê destkewteyan çin bikero şer keno. Vera nê hêrişan zî xoverdayîşê cinîyan her roje beno pîlêr û nê destkewteyî zî bi têkoşînê cinîyan pawîyenê.

Sîstem wazeno bi taybetî cinî û domanan nêtesîr bikero. Bingeyê hêrişê vera doman û cinîyan de tacîz û tecawuzî estê. Dewlete hema ke domanî pîl nêbenê ameyoxê înan kena tarî. Koyê Cûdî, koyê Dêrsimî bi mengan o ke hetê dewlete ra yenê vêşnayene. Bi talanê tarîx û xoza vîrê kurdan yeno çinkerdene. ''

Şene bale ante kampanyaya TJA ser û wina vat: ''Kampanya xeylêk şaristan û qezayan de dîyaye destpêkerdene. Kampanya hîşmendîye esas gêna. Di perrê kampanya estê. Ma çarçewa na kampanya de polîtîkaya şerê taybetî eşkera kenê. Ma kargehan virazenê û wazenê ke wa camêrdî zî tewrê nê kargehan bibê. Vurîyayîşê camêrdan zaf girîng o.

Kampanyaya ma ra dima  vera TJA desbendkerdiş û tepiştişî zêdîyayî. Bi nê hawayî înan waşt ke kampanya pûç bikerê. La se kenê wa bikerê ma do têkoşînê xo dewam bikerê. Çew nêeşkeno verê têkoşînê cinîyan bigêro.''