Mamostaya muzîkî Sena Ebasa ke îşxalê dewleta tirke yê vera Serêkanîyê de neçare mende ke koçê Reqa bikera şaristan de koma muzîkî ya domanan naye ro û wezîfeyê hemserekîya Merkezê Kulturî û Hunerî girewt xo ser.
Îşxalê dewleta tirke yê vera Rojawanî de tewr tay 300 hezar sivîlî neçare mendî ke koç bikerê. Şaro koçber xoverdayîşê xo cayan de ke koçê ci kerd dewam keno.
Mamostaya muzîkî Sena Ebas zî nê kesan ra yew a ke neçare mende ke Serêkanîyê ra koçê Reqa bikera. Pîyanîste Sena Ebas cuya koçî xo rê sey astengîye nêdîye. Sena koçê Reqa ra verê cû Serêkanîyê de domanan rê perwerdeyê muzîkî dayêne û Yewîya Hunermendan de xebatê xo dewam kerdêne.
Sena îfade kerd ke aye xo koçî rê teslîm nêkerd û Reqa de Merkezê Kulturî û Hunerî de komêka muzîkî ya domanan naye ro. Senaya ke nameyê kome kerd ''Feyrûze'' muzîkanê neteweyîyan musnena domanan. Sena heman wextî de wezîfeyê hemserekîya Merkezê Kulturî û Hunerî yê Reqa zî girewt xo ser.
