Komara Afrîkaya Başûre ya ke şîdet dinya ser o tewr zêde tîya yeno ciwîyayene de  cinîyan verba tecawiz û qirkerdişan çalakîye viraşte.

Paytextê Johannesburgî yo ke  teyna aşmaTemmuze de 30 hebî cinîyî ameybî kiştene de bi seyan cinîyî kom bîyê û pê slogananê 'hînî bes o','Nê, nê yo', Pê xo beişke, ti heywan nîyî' qîrayî. Çalakgeran veng da ke wa  Serekkomarê Afrîkaya Başûre  Cyrîl Ramaphosa û otorîteyê selahîyetdarî verba şîdetî tê bigêrî.

Hepiso Heta Mergî Waşt

Ramaphosayî ser çalakîya cinîyan û waştişê înan qisey kerd û va ke ê do cezayê vera  kiştişê cinîyan û sucê cînsî hîna zêde bikê. "Mêrikê ke cinîyan kişenê û tecawizê înan kenê heta peynîye ganî hepisxane de bimanî. Qanûnî ganî bêrê vurnayene ke destûrê serbestîya demdemîye nêdê ke tecawizkar yan zî kiştox heta mergî hepisxane de bimano.

Afrîkaya Başûre de mabênê 1'ê Nîsana 2018 û 30'ê Adara 2019'an de 21 hezar û 222 kesî amê kiştene. Tenê aşma Temmuze de 30 hebî cinîyî ameyî kiştene. Eynî wextî de bi hezaran sucê tecawizî bîyê ,înan ra 41 hezar û 583 ameyî qeydkerdene, goreyê wextê verên sucê tecawizî 100'yî ra 4 bîyo zêde.