Amadekarîya 8ê Adare Roja Cinîyan ê Kedkeran a Dinya yê Têgêrayîşê Cinîyan ê Azadan (TJA), Meclîsê Cinîyan ê Partîya Demokratîke ya Şaran (HDP) dewam kena. Xeylê bajaran de aktîvîte û çalakîyê cîya cîyayî ameyî kerdene.

Tepişteyê ke Zîndanê Mêrdinî de vera tecrîdê serê Rayberê Şarê Kurdî Abdullah Ocalanî grevê vêşanîye de yê bi weîleya 8ê Adare bi rayîrê telefonî mesajî şawitî. Tepişteyan ra Nucane Aslane ard ziwan a pîya Zeynete Saglam û Wekîla HDPyî ya verêne ya Mêrdînî Gulsere Yildirim grûba grevê vêşanîye ya sibayî de ca gena. Aslane vat: ''Ma wazenê ke seserra 21. wa biba ya cinîyan. Ewro serkêşîya cinîyan ê kurdan de mucadeleyê azadîye Rojhelatê Mîyanênî de resenê amancê xo. Ma zî sey cinîyan ê kurdan pê paradîgmaya cinîyan zîndanan de mucadeleyî pîl kenê. Bi na wesîle ma 8ê Adare pîroz kenê. Roje Roja azadîye ya.''

Amed e bi tewrbîyayîşê Wekîla HDPyî Remzîye Tosun  Farqîn Sûr û Pasûr de broşur û vilîkî ameyî vilakerdene. Cinîyan semedê tewrbîyayîşê mîtîngo ke do 8ê Adare de Meydanê Îstasyonî de bêro kerdene veng da.

Dêrsim de Meclîê Cinîyan ê HDPyî esnafî zîyaret kerdî û vilîkî vila kerdî. Cinîyan semedê tewrbîyayîşê aktîvîteya ke do 8ê Adare de saete 12: 00 de bêro kerdene veng da.

Şirnex de zî qezayanê Elkê û Cizîre yê cinîyan vilîkî vila kerdî û semedê tewrbîyayîşê aktîvîteyanê 8ê Adere veng da.

Bedlîs de  zî qezaya Tûxî de bi tewrbîyayîşê Wekîla HDPyî Şevîne Coşkun vilîkî ameyî vilakerdene û 8ê Adare ame pîrozkerdene.

Wan de zî şayîye ameye roganîzekerdene. Wekîla HDPyî ya Mûşî  Gulîstane Kiliç Koçyîgît ke tîya qisey kerd  bale ante grevê vêşanîye yê tepişteyan ke vera tecrîdê serê Rayberê Şarê Kurdî Abdullah Ocalanî yeno kerdene ser û vat: ''Ê pê dêsan de xover danê ganî ma zî wayîrê nê mucadeleyî vejîyê.''

Hatay, Adana û xeylêk bajaranê bînan de zî aktîvîteyê 8ê Adare ameyî kerdene mesajê pîlkerdişê mucadeleyî ameyî dayene.