Bi nizdîbîyayîşê 8ê Adare Roja Cinîyan ê Kedkeran a Dinya aktîvîteyê cinîyan zî zêdîyayî. Amed, Riha, Wan, Îdir, Adana, Mersin, Osmaniye û xeylêk bajaranê bînan ê Kurdîstanî û Tirkîya de aktîvîteyî ameyî kerdene.

Amed de aktîvîteyê 8ê Adere bi coşî dewam kenê. Peyas de şayîyêke ameye organîzekerdene. Şayîya ke cinîyî bi kincanê xo yê tradîsyonkî tewrê ci bîyî sloganê cinî cuye azadîye berz bîyî. Pasûr de zî banê HDPyî de şayî estbî. Wekîle Dersim Dag, aktîvîstê TJA û hemşeradara Pasûrî Fatma Ay ya ke herinda ci de qeyûm ame tayînkerdene tewrê şayî bîyî. Licê de zî cînîyî banê HDPyî de ameyî têhet. Wekîle Semra Guzel zî tede cinîyan merkezê qeza de vilawekî û fularî vila kerdî û semedê tewrbîyayîşê mitînê 8ê Adare veng da.

Reyna bi vîdeoyan zî semedê tewrbîyayîşê aktîvîteyanê 8ê Adare ame vengdayene.

Wan de edamanê Têgerayîşê Cinîyan ê Azadan (TJA) vilawekî vila kerdî ke wa cinîyî tewrê aktîvîteya 8ê Adare bibê. Qezaya Pîrsusî ya Riha de  pîya bi wekîla HDPyî ya Riha Ayşe Surucu cinîyan vilîkî vila kerdî. Bado zî banê partîde derheqê tarîxê xoverdayîşê cinîyan de sînevîzyonêk ame temaşekerdene. Îdir de zî aktîvîstanê TJA cinîyê ke zîndanan de yê înan rê kartê 8ê Adere şawitî.

Meclîsê Cînîyan ê KESKÎ ê Adana zî derheqê 8ê Adre de kombîyayîşê çapemenîye kerd. Mersîn de zî rayberîya Platformê Cinîyan de cinîyê ke zîndanan de yê înan rê kartî ameyî şawitene. Meclîsê Cinîyan ê HDPyî yê Osmanîye zî bi wesîleya 8ê Adare kartê paştdayîşî şawitî zînandan.