Kitabê Alî Aydin Çîçekî yo newe ''Şahê Maran û Loqman Hekîmî'' Weşanxaneyê Avesta ra vejîya.
Kitab de hewt estanikê Şahê Maran cagênê. Nê estanikî cîya-cîya herêman ra ameyê arêdayene û goreyê fekanê herêman ameyê nuştene. Ma bi nê varyant û motîfanê estanikan hem eşkenê ziwanî bidê têver û hem zî estanikî senî goreyê babete û muhtewa herême bi herême vurîyenê eşkenê zaf zelal bivînê. 

Estanika Şahê Maran estanikêda zaf kehen a û dewro entîkî ra ameya reşta roja ewroyî. Estanika Şahê Maran derheqê kultur, bawerîye û fikrîyayîşê şarê ma de zaf melûmatan şanena ma ver. Ma ewro Kurdîstan de hema-hema keyeyê her kurdî de -bitaybetî keyeyanê kurdanê elewîyan de- eşeknê resmê Şahê Maran bivînê. Ewro zî Şahê Maran bi resm û hîkayeya xo ya kehene kultur û hîê şarê ma de ciwîyeno.