Têgêrayîşê Cinîyan ê Azadan (TJA) û Meclîsê Cinîyan ê HDPyî emser startê 8ê Adare Roja Cinîyan ê Kedkaran a Dinya bi sloganê ''Ma rêxistinîya xoverdayîşî kenê, ver bi azadîye şinê'' da. Serê sibayî cinîyê bi kincanê xo yê tradîsyonelan ameyî meydanê nawnayîşî. Cinîyan sloganê  ''Cinîye, Cuye, Azadîye'', ''Ma sereyê xo nêanê war, xo ver danê'', ''Bêserek cuye nêbena'' vatî.

Endamê Platformê Cinîyan ê Dîcle (DAKP), endamê Meclîsê Cinîyan ê KESKî, aktîvîstê TJA, endamê ESPyî, Meclîsê Cinîyan ê Ciwanan ê HDPyî, Meclîsê Cinîyan ê HDPyî, Mayê Haştîye û zaf cinîyî verê Otêla Prestîjî ra ver bi Kuçeyê Gevranî rayîrî ra şîyî. Cinîyan pankartî akerdî û fotografê hemşaredaranê ke qeyûman wezîfeyê înan xesp kerdî  kiriştî. Polîsan bêsemed pankartî kom kerdî, cinîyan zî bi sloganan û zilgitan hêrişê polîsan protesto kerd.

Meydanê nawnayîşî de pankartê bi nuşteyê ''Ma yewîya neteweyîye bi rayberîya cinîyan rêxistin kenê'', ''Kiştişê cinîyan, taciz, tecwuzî polîtîk ê'', ''Têkoşîn dest pêkeno, rêxistinîya xoverdayîşî bikerê'' daliqnayî.

Cinîyê ke kincê tradîsyonelî dayî xo meydan de govend gênê û sloganan vanê, zilgitan erzenê.