Endama Konseya Serekîye ya Pêroyî ya KCK’yî Sozdar Avesta ANF’yî rê qisey kerd û rojdemê sey Newroze, azadkerdişê Baxozî, weçînayîşê 31’ê Adare û kayo ke hukmatê Iraqî Şengal de kay keno erjnayî. Avesta sere de Newroza Rayber Apo û şarî pîroz kerde û şexsê Mazlûm Dogan, Zekîye Alkane, Rahşan Demîrele, Ronahîye-Berîvane û Ûgûr Şakarî de, pêroyê şehîdê azadîye yad kerdî. Avesta va Newroza emserî zaf baş derbaz bîya û waşt ke her kes peyamanê Newroze baş biwano.

Avesta qiseykerdişê xo de wina va: ”Ma bi xoverdayîşanê grevê vêşanîye vera Newroze şîyî û Newroze hawayêkê winasîyî de pîroz kerde. Newroza emserî de her kesî eşkera dî ke şarê ma senî xo ver dano û senî girêdayeyê Rayberîye yo. Ez reyna vana, ruhê Newroze resto armancê xo. Newroze êdî hewteyê qehremanîye yo.”

Serkewtişê QSD’yî serkewtişê şaran û cinîyan o

Avesta bale ante serkewtişê QSD’yî yê vera DAÎŞ’î ser û wina qisey kerd: “DAÎŞ 5 serran ra dima hetê QSD, YPG-YPJ’yî ra ame qedênayene û no serkewtiş rastê Newroze ame. Manaya ci zaf muhîm a. No serkewtiş şehîdan rê, keyeyanê şehîdan rê, şarê Rojakewtene û Vakurê Surîye rê pîroz bo.

Rayber Apo vano seserra 21’î seserra cinîyan a. Bi nê serkewtişî pêroyê dinyaye na rastîye dîye. Na cograyfa de nameyê cinîyan çin bi, cinîyî bibî sey koleyan, la ewro cinîyî bi îrade, hêz û xoverdayîşî yenê namekerdene. Nê xoverdayîşî manaya pîle daye çalakîyanê Leylayan. Cinîyan bi nê xoverdayîşî cewabo pîl da bi Erdoganî yê Dehaqê ewroyî.

Vera fermanî cewabêko bimana bi

No serkewtiş, serkewtişê Êzdîxanî yo. Çunke şexsê cinîyan ê Êzîdîyan de anorê merdimahîye amebi esîrgirewtene. Serkewtişê QSD’yî bi yadîgarê şehîdanê fermanê 74’ine. Ganî şarê ma na roje sey roja pîroze bivîno û wina pîroz bikero.

Hêzanê YBŞ’yî, 5 serrî sînor pawit, la ewro ameyîşê leşkeranê Iraqî ra dima, korîdor ame girewtene. Kesê ke bi destê YBŞ’yî DAÎŞ’î ra ameyê raxelesnayene nêeşkenê agêrê Şengal. Bi nê qeydeyî şarê Êzîdîyan ra vanê ‘ma îradeyê şima yê azadî nêşinasnenê’. No nêno qebulkerdene.

Ganî keda Mam Zekîyî rê wayîrtîye bêro kerdene

Problemê Şengalî tena problemê Êzîdîyan nê, problemê Iraq û pêroyê Rojakewtena Mîyanênî yo. Hukmatê Iraqî, bi taybetî zî Serekkomar ganî Êzîdîyan baş bişinasno. Ganî yew şar bi merg, teda û îşkence teslîm nêro girewtene. Ganî dîyalog esas bêro girewtene. Hêzê Pawitişî, Meslîsê Xoserîye yê Demokratîkî û Têgêrayîşê Cinîyan ê Şengalî çarçewaya qanûnan de ameyê awankerdene. Ganî pêro hetê fermîyî ra bêrê şinasnayene. Êzîdîyî dest dergê keda kesî nêkenê, ê wazenê ke îradeyê înan bêro qebulkerdene.

Ganî hukmatê Iraqî, hêzanê xo kontrol bikero û meverdo provakasyonê winasîyî dolimêna biqewimîyê. Reyna tayê hêzê kanî kenê ke alozîye bifîyê kar. Şarê ma no derheq de ganî heşar bo. Wazenê ke tayê eşîretî bikewê bi yewbînan. Beno ke tayê xeletîyî bibê, la nê problemî ganî bi diyalog bêrê çareserkerdene. Êzîdîyî rêça Mam Zekîyî de, bi keda pîle, ganî destkewteyanê xo bişeveknê.

Wayîrê îradeyê xo bivejîyê û bivejîyê meydanan

Weçînayîş seba Erdoganê Dehaqî bîyo meseleyê estbîyayîş û çinbîyayîşî. Ganî her kes vera faşîzmî, bi nê ferasetî beşdarê xebatan bibo û reyanê xo bierzo ci. Her kes bi ruhê Mehmetan, Asyayan û Sevêyan ganî wayîrê îradeyê xo bivejîyo.

Bi taybetî zî şarê Êlîhî, ganî bi ruhê xoverdayîşê Nasir Yagizî şoro sindoqan ser û reya xo bierzo ci. Serhed ra heta Amed, Riha ra heta Dîlok, Semsûr ra heta Colemerg, ganî pêroyê Kurdî wayîrê îradeyê xo bivejîyê û şorê sindoqan ser. Xora faşîzm bîyo binkewte, ganî ma nêverdê ke xo newe ra awan bikero.  Bi ruhê xoverdayîşê Leylayan û Nasiran no wisar do bibo wisarê şaran û cinîyan. No zî bi destê hêzanê QSD’yî ameyo awankerdene. Ez şerwananê QSD’yî pîroz kena, serkewtişê înan serkewtişê seserre yo.”