Heyetanê eleqedaran ê DEM Partî badê vengdayîşê tarîxîyî yê Rayber Apoyî yê 27ê sibate qerarê kombîyayîşî girewt. Meclîsê Partî û hemserekê bajaran serekîya Hemserekê Pêroyî Tulaye Hatimogullari û Tuncer Bakirhanî de ewro merkezê partî de kom bîyî.

Bakirhanî verê kombîyayîşî qiseykerdişê kerd, bale ante Aşma Remezanî ser û waştişê haştîye û waybiratîye ardî ziwan.

Bakirhanî bale ante vengdayîşê Rayber Apoyî ser û wina qisey kerd:

''Vengdayîşê bedilnayîş, ravurîyayîşî ame kerdene. Vengdayîşo muhîm bi her hetî bale ante xo ser û ame teqîpkerdene. Ma sey DEM Partî semedê serkewtişê nê prosesî do çalakî û aktîvîteyan bikerê. Ma ewro Meclîsê Partîya xo semedê girdkerdişê hêvîya haştîye kom kerd. Heme hemrayanê ma ke kede û bedel da û ewro tîya nîyê seba ke bi bedelê înan haştîye ameye mumkunkerdene ma înan bimînet yad kenê  û ma do keda înan bi haştîya bianore tacîdar bikerê. Ma tîya ra semedê nê vengdayîşî Birêz Ocalanî selam kenê.

Vengdayîş ame kerdene, rêxistine cewabo pozîtîf da. Hinî gerek serûberkerdişê huqûqî û sîyasîyî helêke cuwa ver bêrê kerdene. Tîya rolo tarîxî yê meclîsî est o. Muxatabê nê vengdayîşî meclîs o. Hêvî kena ke meclîs rojanê verê ma de goreyê vengdayîşî serûberkerdişan keno. Gerek no proses nêro hebakerdene.

Vengdayîş kam ke Tirkîyaya demokeratîkî wazeno berpirsîyarîye înan bar keno. Wa çew berpirsîyarîye ra meremo. Haştîye ma perûne rê dana qezenckerden. Kurdan rê dana qezenckerdene. Çunke kurdan zulmo tewr gird dî. Reyna elewîyan rê, bawerîyanê bînan rê do bido qezenckerdene.

Bahçeli zî vat ê wayîrê vengdayîşî bivejîye la têna bi vatişî nêbeno ganî pratîk de bêro caardene. Birêz Bahçeli rayîrê nê temînatê demokratîk û huqûqî yê ke huqûqê wayûbiratîye pawenê. Coka gerek helêke cuwa ver temînatê huqûqî bêrê caardene.  Eke proses bibo derg efekte beno. Tecrubeyê dinya de no ame vînayene. No proses bi dergbîyayîşî wa nêro efektekerdene. Berpirsîyarîya girde ya ma perûne na ya.''

Badê qiseykerdişî kombîyayîşî çapemenîye rê qefilnaye dewam kerd.