Cinîya ciwan a 19 serrîye hewteyê vîyarteyî de banê wendegehê Deqqayî ya ke tede perwerde  dîyene de ameye veşnayene. Nameyê cinîya ke ameye veşnayene Nusrat Jahan Rafî ya. Serekwezîre Şêxe Hasîna vat bêçika kamî ke nê serebutî de esta ê do bêrê muhakemekerdene. Eşkerayîya ke polîsî roja Îne de daya de ame vatene ke 17 kesî seba ke têkilîya ci bi serebutî esta ameyê destbendkerdene û nînan ra yew zî mudirê dibistane yo ke fermanê veşnayîşî dayo.

Selahîyetdarê polîsan Mihemed Îkbalî AFP'î rê qisey kerd û derheqê mudirê wendegehî de vat, “Waşt, wexto ke Nusrat Jahan Rafî gerrekerdişî ra fek ranêverda, a bêra kiştene.”

Gerreyê tecîzî kerd, polîsî vat, ‘muhîm nîyo’

Rafî  menga Adar de rîyê cehdkerdişê tecawizî ra gerre kerdibî. Goreyê dîmeno ke ameyo antene, polîso ke gerreyî qeyd gêno vano, “çîyêko mhuîm nîyo”.

Goreyê zanayîşê ke Îkbalî dayê hîrê hevalê aye yê sinife, 5 kesê ke ameyê destbendkerdene bi çîte cinîka ciwane girê daye û bado zî benzîn verdayo ser.

Waşt ke serebutî sey xokiştiş ramojnê la ser nêkewtî

Îkbalî vat, “Plan o bi ke waşt ke serebutî sey xokiştiş bimojnê la ser nêkewtî, seba ke çîte veşe, dest û payê Nusrat Jahan Rafî bî a. Rafî serê banî ra ameye bi cêr.

Rafî 10'ê Nîsane cuya xo kerde vîndî. Rafî verê merdişî vîdeoyêk weşana, sûcdarîyê xo yê serê mudirî dewam kerdî. Rafî vat, “dest dergê mi kerd” û nasnameyê tayê hêrişkeran dayî. Rafî vat, “Heta peynîye ez do têkoşîn bida”

Reaksîyonanê girdan ser o Serekwezîre Şêxe Hasîna vat, tu sûcdarêk nêeşkeno xo prosesê qanûnî ra bixelisno.

HRW'î reaksîyon da

Rêxistina Taqîbkerdişî ya Heqanê Merdiman HRW’î vengdayîş bi hukmatî kerd ke tehqîqato cîdî bêro kerdene û berpirsîyarî bêrê muhakemekerdene. HRW’î vat, “Bi hawayêkê kovî kiştişê cinîyêka ke edalet wazena, mojneno ke hukmatê Bangladeşî paşt nêdano mexdûran ê ke  hêrişanê zayendan rê merûz manenê.”