Hukmatê AKPyî rewşa vîrusê Korona (Covid-19) de dest na şaredarîyanê HDPyî ser. Wekîla HDPyî ya Êlihî Ayşe Acar Başaran vera tayînkerdişê qeyûman û polîtîkayanê dişmenîya kurdan nêrazîbîyayîşê xo mojna. Başarane ard ziwan ke seraser pêro dinya vera vîrusê Korona bi metodanê cîyayan têkoşîn kena la AKP hêrişê destkewteyanê kurdan keno.

Başarane vat: ''Roja verêne ra nata ma vanê ke Korona pêro merdimîye rê gef waneno, ganî ma vera ci tebdîran bigêrê. Labelê AKP rewşêka winasêne de dişmenîya kurdan dewam keno. AKP weşîya merdimîye visneno binê tehlukeyêkê pîlî û têna îqtîdarê xo fikirîyeno.

Pêro şaredarîyê HDPyî vera vîrusî xzimeyê pakîye kenê û hetkarîya şarî kenê. Mîsalê ney zî Şaredarîya Êlihî ya. Hêle bi hêle seba weşîya şarî xebitîyayêne. La dest nîya şaredarîya ma ser. Dîmenan de yeno dîyene ke kesê ke dormeyê şaredarîye girewt zî asayîşê înan ê weşîye çinbi. AKP şar, polîs û xebatkaranê xo nêpaweno. Erdozan û wezîrê ci têna weşîya xo fikirîyenê. Vîrusê Korona felaketêko pîl o. Ganî ma sîyaset bidayêne kişte. La dest nayî şaredarîyanê ma ser û bi hezaran tepişteyî zîndanan de yê. Tirkîya de wexto ke babete kurd biba îqtîdar xo ra ber çîyêk nêfikîrîyeno û hêrişê kurdan keno. Embazê ma yê ke ameyî destbendkerdene meseleyê înan ê weşîye estê. Kesêk nêeşkeno xizimkarê nê şarî sûcdar bikero. Sûcdarê tewr pîlêrî AKP û hemparê ci MHP yê.

Kurdîstan de vera vîrusê Korona tebdîrêk zî nêame girewtene. Tirkîya cuya kurdan nêfikîrîyena. A wazena Korona mîyanê kurdan de vila biba. Wa hukmat baş bizano ke eke ê Kurdîstan de tebdîran nêgêrê, vîrus do pêro Tirkîya de vila bibo.''