Paytextê Almanya Berlin û Stuttgart de bi wesîleya 8ê Adare Roja Cinîyan ê Kedkaran a Dinya tay çalakîyî ameyî kerdene.

Berlin

Qezaya Neukollnî ya Berlinî de cinîyî nameyê Organîzasyonê 'Alliance of Internationalist Feminists' ser o verê bînaya şaredarîye de ameyî pêser û înan vilawekî vila kerdî bale ante girîngîya 8ê Adare ser. Çalakîye de cinîyan flamayê TJK-E akerdî û qala têkoşînê azadîye yê cinîyanê kurdan kerde. Suzanna Rossling çalakîye de qisey kerd û wina vat: ''Ma roja yewşemeyî saete 15:00 de S-U Warschauer Strasse de do bêrê pêser. Ma do hêrişê nîjadperestî yê Hanau, tedaya vera multecîyan, meseleyanê koçberam protesto bikerê. Ma do qala keda cinîyanê kurdan a seba têkoşînê azadîye yê cinîyan bikerê.''

Stuttgart

Stuttgart de zî hetê Wendekaranê Cinîyan ê Kurdîstanijan (JXK) û Cinîyanê Ciwanan ê Azadan (JCA) ra çalakîya 8ê Adare ameye kerdene. Çalakîye de panelê bi nameyê 'Ma rê estanikan mevaje' ame kerdene û cinîyan derheqê tedaya sîstemî û metodanê şerî yê taybetan ê vera cinîyan ser o qisey kerd. Semîner de dayîya zanayene ke estanikan ra heta medyaya komelkîye cinîyan rê tim yew şekîl yeno dayene.