Koordînasyonê KJKyî ra Besê Erzîncan derheqê 8ê Adare de, têkoşîn û xoverdayîşê cinîyan de ANFyî reyde tay ercnayîşî kerdî.

Ercnayîşê Besê Erzîncan ra beşêk wina yo:

''Şewatê Îmraliyê seba şarê ma mesajê planêçinkerdişî yo. Tecrîdê Rayber Apoyî bi xo hêrişêko pîl ê vera cinîyan o. Tecrîd qesasê sîstemê serdestê camêrdan o. Rayberê ma kerd ke cinîyî azad bibê, sîstemêk awan bikerê, bibê partî. Coka sîstemo hegemonîk Rayberê ma rê zaf hêrsbîyaye yo. Ez venga pêro cinîyan dana ke wayîrê felsefeya Rayber Apoyî, xeta ey bivejîyê û Rayberê ma hîna hol fam bikerê. Seba naye têgêrayîşê cinîyanê Vakurê Kurdîstanî wayîrê tecrûbeyêkê pîlî yê. Çalakîyê 8ê Adare ganî têkoşînê azadîye yê Rayberê ma reyde bêrê pabestene.

Ganî cinîyê tirkî hîna zêdêr têkoşînê azadîye yê cinîyanê kurdan fam bikerê.  Ganî ma têkoşînê xo bikerê yew, xo bikerê pîlêr û hêzê xo bikerê yew. Heta ke tarîxê têkoşînê cinîyanê kurdan nêro famkerdene cinîyê tirkî nêeşkenê ser bikewê. Hetê tarîxî ra cinîyî tima meyî kolekerdene. Rastîya xo ra ameyî dûrvistene. Sayê rayberîya Rayber Apoyî cinîyan gerîlayan mîyan de ca girewt û sîstemê xo, sîstemê bire yê xo awan kerdî. Cinîyî tewrê gerîlayan bîyî û bi nê hawayî sextekarîya sîstemê serdestîya camêrdan ameye famkerdene.Cinîyê kurdî  çalakîyan de û cuye de rayberîya gerîlayan kenê. Yewînanê camêrdan rê ferman danê. Gerîlaya cinîye sembola fedakarîye, çêrîye ya. Gerîlaya cinîye çimeyê cuya azade û hêzî ya.

Sîstemo kapîtalîst pê Şorişê Cinîyan ê Rojawanî  û pê YPJyî qayîl nîyo. Tehamulê ci bi têkoşînê cinîyan çin o. YPJyî sîstemê serdestîya camêrdan parçe kerd. Cinîyan binê YPJyî de rayberîye kerde ke dinya bixelisa. Sîstemê serdestîya camêrdan wazena ke YPJ çin bikero ganî destûr nêro dayene ke no bibo.Cinîyê Başûrê Kurdîstanî pê ser kewtî ke vera tecawuzan, fetwayan, qirkerdişê cinîyan tewirêk girewt. Başûr de cinîyî hê benê yew. Têkoşînê azadîye yê cinîyanê Başûrê Kurdîstanî keno ke têkoşînêkê hîna birêxistin û hemparî bikero.

Rojhelatê Kurdîstanî de zî têkoşînê azadîye yê cinîyan vera destbendkerdişan, tedayan bi xoverdayîşî beno pîl. Cinîyî wazenê ke bira xo bidê. Cinîyanê kurdan hîşmendîya xo, cigêrayîşê xo, hîsê xo yê welatperwerîye û azadîye kerdî pîlêr. Cinîyê Şengalî zî benê hîşmend, rêxistin benê, xopawitişê xo kenê û aver şonê. No têgêrayîşê înan do hîna bibo xurtêr.

Ma serra 2020î de pê hêvîdar ê ke qerardarîya ma, bawerîya ma, îddîaya ma ya seba berzkerdişê têkoşînî berz a. Zehmetî û dejê ma zî estê la tecrube, îmkan û îdîayê ma xeylêk ê. Seba ke ma têkoşînêkê azadîye yê cinîyan ê serkewteyî bikerê bingeyê ma esto.  Krîzê sîstemê hegemonîkî ney têkoşînê cinîyan o birêxistin, biplan û biarmanc do rayberîya prosesî bikerê.Ma do bi çalakîyan, xoverdayîş û têkoşînê xo nê bingeyî aver berê. Cara vera faşîzmê dewleta tirke ma do xo ver bidê. Rojdemê ma yo sereke wayîrvejîyayîş û azadkerdişê Rayberîya ma yo.

Ma vera dewleta faşîste û serdestîya camêrdan gamanê stratejîkan erzenê û bi nê hawayî aver şinê. Ma sey cinîyan yewîya xo kenê pît û têkoşînêkê hemparî aver benê.Seba ke hîşmendîya cinîyan aver şora no zaf girîng o ke konferansî, semînerî, perwerdeyî û platformê muneqeşayan bêrê kerdene. Azadîye hêverî mezge de yena destvistene. Ganî têgêrayîşê cinîyan dewan ra heta şaristanan seba cinîyanê kedkaran plansazîyan bikerê. Wa ciîyî bêrê pêser û tecrubeyanê xo yewbînan reyde pare bikerê.

Ganî ma çalakîyanê cinîyan aver berê. Cinîyê kurdî emser zî xebetanê seba yewîya neteweyîye do dewam bikerê. Cinîyê kurdî do rayberîya yewîya neteweyîye û kongreyan zî bikerê.Ma do pêro xebetanê xo yê cinîyan bi caardişê konfederalîzmê demokratîkî game bi game aver berê. Konfederalîzmê cinîyan o demokratîk têna yew modelê rêxistinî nîyo. Cinîya azade viraştoxa felsefeya cuye ya. Ganî ma hêverî bingeyê felsefeya azadîye de bêrê pêser, waştişê xo yê cuye bihêz bikerê û dima seba awankerdişê cuya newîye rêxistinbîyayîşê naye bihêz bikerê.