Buldane: Ma do vera tecrîdî mucadeleyê xo xurt bikerê

Hemsereka Pêroyî ya HDPyî Pervîn Buldane Leyla Guvena ke vera tecrîdê serê Rayberê Şarê Kurdî Abdullah Ocalanî dest kerdo girevê vêşanîye, silam kerd û va: ‘‘Ma do vera tecrîdî mucadeleyê xo xurt bikerê.‘‘

Meclîsê  Cinîyan ê Partîya Şaran a Demokratîke (HDP) bi rojdemê  25ê Teşrîna peyêne Roja Paştdayîş û Mucadaleyê Mîyanneteweyîye ya Vera Şîdetê Serê Cinîyan û weçînitişê cayîyan kombîyayîşêk viraşt.

LEYLA GUVENE AMEYE SILAMKERDENE

Hemsereka Pêroyî ya HDPyî Pervîn Buldane kombîyayîş de qisey kerd. Buldane Leyla Guvena ke vera tecrîdê serê Rayberê Şarê Kurdî Abdullah Ocalanî dest kerdo girevê vêşanîye silam kerd û va: ‘‘ Ma  wayîr ro çalakîya Leyla Guvene vejîyenê. Ê zî zanê ke bi nê hêrişan senî ke heta ewro îradeyê cinîyan teslîm nêgirewto, ewro ra tepîya zî nêeşkenî bigêrî. Çiyo esasî ca nê rayîr o. Hedefê ma yê. Ma do zîndanan, kuçeyan û meclîsî de zî nê rayîrî ra şirê.‘‘

‘MA DO TECRÎD BIRIJNÊ!‘

Buldane qalkerdişê xo rê wina dewam kerd:‘‘ Parlamentera ma ya Colemêrgî Leyla Guvene semedê baleantişê tecrîdê serê Brêz Ocalanî ser kewta girevê vêşanîye. Na çalakîya ke Guvene bi xoverdayîşê girdî daya destpêkerdene ma silam kenî. Ma zî do bi çalakîyan mucadeleyê xo xurt bikerê. Tecrîd heman wextî de azadîya cinîyan rê beno. Ma do bi cinîyan tecrîdî birijnê.‘‘

‘BI AKPYÎ TECAWUZ Û QIRKERDIŞÎ ZÊDÎYAYΑ

Buldane hêrişê AKPyî yê vera cinîyan zî vist vîrî û va: ‘‘Cinîyan ra tersenê coka înan rê hêriş kenê. Sîyaset, xoverdayîş û qerarîya cinîyan ra tersenê. Rejimê yew merdimî zaf hole zano ke hêzo ke înan dano war cinîyî yê. Bi AKPyî qirkerdiş, tacîz û tecawuzî zêdîyayî. Ganî vera naye ma cinîyî bêrê têhet vernîya nînan bîgîrê.

  ‘WEÇÎNITIŞÊ CAYÎYAN RÛTÎN NÎYO‘

Buldane bale ante muhîmîya weçînitişê cayîyan ser û va: ‘‘Ma bi tewrbîyayîşêkê  hêzdarî yê cinîyan hadreyîya weçînitişî kenê. Wa qet çew ney sey weçînitişêkê rûtînî mevîno. Nê weçînitişî de cinîyî do cayî ra ver bi îqtîdarî şirê. Ma soz danê ke heqê cinîyan ê ke qeyûman gasp kerdî do pêser bêrî girewtene. Ma cinî do bi yewbîyayîşî heme heqanê xo dest bifînê, embazanê xo azad bikerê û tecrîd birijnê.‘‘