Licê de  5 cinîyan Kooperatîfê Cinîyan ê Licê naro û nika no kooperatîf 25 cinîyan îstîhdam keno. Kooperatîf de rîçal, salçe, tişî, sebze û meyweyê wişkî virazîyenê û yenê rotene. Cinîyî heman wextî de berhemanê şit û tekstîlî zî ber anê.

Ronayoxanê kooperatîfî ra Leylane Karakeçî da zanayene ke înan bi salçeyê firingan dest pê karî kerd û vat: ''Ma nika berhemanê xo erşawenê Îzmîr, Bursa û Anqara, Amed de zî berhemê ma roşîyenê. Lokantayanê Amedî emser xeylêk sîparîşê tirşî da. Ma pandemî de 3 mengan nêxebitî. Pandemî hetê madî û manewî ra tesîrê ma kerd. Ma kargehê xo yê tekstîlî de maske û kincê nêweşxaneyî deştî. Ma nika xebitîyenê. Yew hesabê ma yê medyaya komelkîye esto, ma uca ra sîparîşan gênê. Ma wazenê kooperatîfê xo hîna hîra bikerê. Zaf cinîyî wazenê tîya de bixebitê.'' 

Kedkaranê kooperatîfî ra Alîye Tekîn zî vat: ''Ez aslê xo de kebanî ya la mi waşt ke pereyê xo qezenç bikera. Tîya ra ber ca çin o ke ma tede bixebitê. Cinî, ciwan û camêrdî pêro bêkar ê. Tîya seba ke ma tede payan ser o vindenê ma rê girîng o. Mi yew-di cinîyan ra eşnawit tîya de kooperatîf abîyo. Ez ameya mi vat ez wazena bixebita Dima zî mi dest pê karî kerd.''