Seyhan de cinîyê kurdî reyan keyeyanê xo de bi tena serreyê xo, reyan zî verê beran de embiryananê xo dir terraqeye reyde bi kîloyan gozan weçînenê, bi pereyê ke qezenc kenê paştî danê ekonomîya keyeyê xo.
Cinîyî bi 10-12 TLyî xaşeyêk weçînenê, hemverê şertanê cuye yê ke her roje hîna benê giran zî acizîya xo anê ziwan.
Keyeyê Hazal Turke yo ke nizdê 25 serrî verî dimayo ke dewa înan amî vêşnayene mecbûr mendî ke Wan ra bar bikerê zî înan ra yew o.
‘MA BI NIMITKÎ QISEY KERD’
Maye Hazale zehmetîyê ke înan serrê ewilênan de barkerdişî ra dima hetê madî û manewîyî ra antê ser qisey kerd û vat: “Serrê ma yê ewilênî zaf zehmet bîyî. Tewr zor zî ziwan bi. Ma tenya kurdkî zanê. La ê wextan de qiseykerdişê kurdkî qedexe bi. Rixmê nê zî ma keyeyanê xo de bi pistinîye, bi nimitkî qisey kerdêne.”
Maye Hazale dewam de wina vat: “Halê ma kurdan heme cayan de wina yo. Heta ma mebê yew ma do wina bimanê. Eke Wan de dewa ma nêameyêne vêşnayene nika nê gozî yê şarî nê do yê baxçeyê mi bîyêne.”
‘SERREYÊ XAŞEYÎ 12 TL’
Maye Hazale vat: “Karo ke kenê bi serreyê xo qîmê debarî nêkeno. Ma gozan şiknenê û zereyê înan tira vejenê. Xaşeyêk 25 kîlo yo. Çi rind ke ma heta şand 1 xaşeyê gozan bişiknê, serreyê xaşeyî 12 TL danê.”
DESTÊ CI DE SÎYAYÎYA GOZAN
Maye Hazale qiseykerdişê xo wina dewam kerd : “Seke her karî nê karî de zî zehmetîyî estê. Hela biewnî nê halê giştan ra. Destanê mi de bi serran o sîyayîya gozan esta. Serê giştanê mi qeleşîyayê. Xeylî domanê min ê qickekî estê. Ganî ez înan weyî bikerî.”
Embiryaya Hazale Gazel Akine (44) ke aye zî Wan ra amîya koçkerdene bi “ şiktişê findiqan ” debarîya xo kena.
Akine wina vat : “Seba ke zehmetîya findiqan ya gozan ra hîna tay a serreyê xaşeyî 10 TL danê ma. Verê nê karî zî ma karê tekstîlî kerdêne. 4 domanê mi estê. Ge-ge ez roje de 2 xaşeyî findiqan şiknena. Zaf nêyo, la qe mebo xercê mekteba domanê xo eşkena bidî.”
