Endama Koordînasyonê KJK’yî Besê Erzîncane Stêrk TV de, programê Rojava Jinê de derheqê rojdemî de qisey kerd. Erzîncane çalakwanê grevê vêşanîye silam kerdî û ard vîrî ke grevê vêşanîye 5 mengî xo ra dima verdayê, çalakî resaya amacê xo û vat, “Na çalakîya ke bi serkêşîya Leyla Guvene dest pêkerde, bi tewrbîyayîşê Nasir Yagiz, Fadîle Toke, Îmam Şîş û embazanê binan bîye vila û heme dinya de veng da û Kurdistan de cimat bi haya.

Zere de û teber de çalakîyê ke dorê grevê vişanîye de bîyî xurt dewam kenê. Bi weçînitişê cayîyî şarê ma yê Tirkîya û Kurdistanî ramot ke ê bîyê haya. Nê prosesî de ê şîyî serê sindoqan û merdim nê de eşkeno tesîrê çalakîyanê grevê vêşanîye bivîno.

Ancî teberê welatî de xeylî aktîvîst, femînîst û sîyasetmedarî destekêko pîl dayo na çalakîya ke bi serkêşîya Leyla Guvene dest pêkerda û tesîrêkê pozîtîfî çalakîye ser o kerdo. Birastî zî merdim eşkeno vajo ke hetê mucadeleyî ra moral û motîvasyonêko pîl virazîyayo. Bi serkêşîya çalakwananê grevê vêşanîye mîyanê şar, ciwan, cinî û gerîlayî de têgêrayîş û aktîvîteyêka pîle virazîyaya.”

Serkêşê Prosesî Cinî û Mayî yê

Erzîncane pêgirewtîyîya têgêrayîşê cinî bi Ocalanî ard vîrî û vat, “Rayberîye cuyêka newî awan kerde, bi cinîye hêzêko newe awan kerd û qewimîyayîşanê 5 hezarî serran resnayî merheleyêka bîne. Wayîrêvejîyayîşê Rayber Apoyî de yeno dîyene ke rolê cinî zaf zêde yo. Heme cinîyê ke serê erde Mezopotamya de ciwîyenê, înan ser o zextî estê û qirkerdişî hemverê înan de estê. Na çetinîye ewro zî esta. Bi pawitişê felsefeya Rayber Apoyî ke îdeolojîya azadîya cinî ya, tena cinîyê Kurdî nê, heme cinîyê dinya, halê Serek Apoyî meraq kenê û azadîya ê wazenê, ê xo rê sey serkêş zanê.”

Erzîncane vat cinî û mayî nê prosesî rê serkêşîye kenê û wina dewam kerd, “Kurdistan de êyê ke tewr zaf zehmetî ancenê cinî û mayî yê. Hesasîyetê mayan seba Rayber Apoyî ra naye ra zêde yo. Seba naye mayî û cinîyî grevê vêşanîye rê serkêşî kenê. Rayîrê çareserî yê krîzê dinya îdeolojîya Serek Apoyî û felsefeya ê ya. No problemê tecrîdî yo ke bîyo unîversal hemverê projeyê Neteweyo Demokratîk ê Rayberîye de yeno rayraberdene.”

Nê Weçînitişî de AKP Bin Kewt

Erzîncane derheqê weçînitişanê Vakurê Kurdistanî û Tirkîya de zî vat, “Weçînitişî şertanê nenormalan de virazîyayî. Weçînitiş de yo ke ma sey weçînitişo ke prosesê şerê dinya yê 3’inî de virazîyayo name kenê, tarîxê Tirkîya de reya ewilêne yo ke weçînitişêko winayên o cayî virazîyayo. No weçînitiş tesîrê xo serê hemeyê Rojakewtena Mîyanêne de keno. Çunke tede problemê Kurdan esto. Rîyê îqtîdarê Erdoganî yo ke wextêko derg ser de bi bi nê weçînitişî vejîya werte. AKP’yo ke waştêne Kurdistan de bi tayînkerdişê qeyûman Kurdan raste ra wedaro bi nê weçînitişan kerd vînî, meterîsêko hemver awan bi û şaro Kurd bi ser kewt.”

Erzîncane peynîya qiseykerdişê xo de nê vatî: “Serkêşîya awankerdişê neteweyê demokratîkî cinîyî kenê û vat, ganî mîyanê cinîyan de hişmendî û waştişê azadîye hîna aver şiro û cinîyî nê averşîyayîşî rê serkêşîye bikerê. Cinîyê ke mîyanê HDP’yî de serkêşîye kenê ganî warê ziwan, kultur, perwerde, weyîkerdişê domanan û debare de hîna aktîf bê.”